Rikonstruksioni i rrugës Kombinat–Ndroq–Plepa, ARRSH gati dy tenderë me fond rreth 3 mld lekë
Autoriteti Rrugor Shqiptar planifikon hapjen e dy tenderëve për vijimin e rikonstruksionit të aksit Kombinat–Ndroq–Plepa, me një fond total afro 3 miliardë lekë.
Dy lote të reja në prokurim
Sipas të dhënave zyrtare, procedurat do të përfshijnë lotin 2 dhe lotin 3 të këtij aksi rrugor. Fondi limit për lotin 2 është rreth 1.13 miliardë lekë, ndërsa për lotin 3 arrin në rreth 1.46 miliardë lekë. Të dy tenderët pritet të zhvillohen gjatë vitit 2026, ndërsa detajet teknike mbi segmentet do të publikohen me hapjen e procedurave.
Loti i parë në zbatim
Për lotin 1 të këtij projekti, kontrata e punimeve është lidhur që në shtator 2024. Zbatimi i saj i është besuar bashkimit të operatorëve “Arifaj” dhe “Eurokos Holding”, me një vlerë prej 567.75 milionë lekësh pa TVSH.
Aks alternativ për Tiranë–Durrës
Rruga Kombinat–Ndroq–Plepa konsiderohet një lidhje e rëndësishme mes Tiranës dhe zonave jugore, duke shërbyer si alternativë ndaj autostradës Tiranë–Durrës. Ky aks përshkon zona me densitet të lartë banimi dhe prej vitesh ka pësuar amortizim, duke ndikuar në uljen e përdorimit nga drejtuesit e mjeteve.
Përmirësim i sigurisë dhe qarkullimit
Ndërhyrjet synojnë përmirësimin e kushteve të lëvizjes dhe rritjen e sigurisë rrugore, në një kohë kur projekti zhvillohet paralelisht me zgjerimin e autostradës Tiranë–Durrës. Në total, aksi Kombinat–Ndroq–Plepa ka një gjatësi prej rreth 28 kilometrash.
k.jpg)