Shqipëria ndër vendet më të prekura në Europë nga valët e të nxehtit dhe përmbytjet
Shqipëria renditet mes vendeve europiane më të ekspozuara ndaj ndryshimeve klimatike, me ndikim të fortë nga valët e të nxehtit dhe përmbytjet gjatë dy dekadave të fundit.
Paralajmërimi në konferencën rajonale për klimën
Gjatë konferencës rajonale “Të bashkuar për klimën”, e zhvilluar në Tiranë, ambasadorja e Zvicrës në Shqipëri, Ruth Huber, deklaroi se vendet e Ballkanit Perëndimor po përballen me sfida të ngjashme klimatike, por me nivele të ndryshme ekspozimi dhe reagimi.
Sipas saj, Shqipëria është ndër vendet europiane më të prekura nga valët ekstreme të të nxehtit dhe përmbytjet që kanë goditur rajonin gjatë 20 viteve të fundit. Ambasadorja theksoi se kriza klimatike nuk është më një rrezik i së ardhmes, por një realitet që po ndikon drejtpërdrejt në jetën dhe ekonominë e qytetarëve.
Një raport i Bankës Botërore vlerëson se Shqipërisë do t’i duhen rreth 6 miliardë dollarë investime gjatë dekadës së ardhshme për të përballuar rreziqet klimatike dhe për të forcuar mbrojtjen ndaj fatkeqësive natyrore.
Sipas raportit, çdo 1 euro e investuar në përshtatjen ndaj klimës mund të sjellë deri në 10 euro përfitime ekonomike, ndërsa mungesa e investimeve mund t’i kushtojë vendit deri në 7% të Prodhimit të Brendshëm Bruto.
Qeveria parashikon kosto edhe më të lartë
Edhe “Plani Kombëtar për Përshtatjen ndaj Ndryshimeve Klimatike 2026–2036” i qeverisë shqiptare parashikon një faturë më të lartë investimesh, në rreth 9.8 miliardë dollarë.
Dokumenti parashikon ndërhyrje për ndërtimin e sistemeve kulluese, argjinaturave, rezervuarëve, teknologjive mbrojtëse ndaj fenomeneve ekstreme dhe sistemeve moderne të paralajmërimit dhe informacionit. Sipas planit, Shqipëria ka humbur rreth 2.3 miliardë dollarë gjatë tre dekadave të fundit si pasojë e fatkeqësive natyrore.
Koçiu: Klima kërkon investime reale
Zëvendëskryeministrja Albana Koçiu deklaroi gjatë konferencës se sfidat klimatike mund të përballohen vetëm përmes investimeve konkrete dhe forcimit të bashkëpunimit rajonal. “Klima menaxhohet nga investime reale, nga tubacione dhe diga që i qëndrojnë kohës, nga sisteme parandalimi dhe nga institucione që reagojnë në kohë. Kjo është përshtatje, jo thjesht një dokument, por një sistem që funksionon si i tërë”, u shpreh ajo.
Koçiu theksoi gjithashtu rëndësinë e financimeve dhe të dhënave për menaxhimin e krizës klimatike, duke nënvizuar se përmbytjet, zjarret dhe thatësirat nuk njohin kufij shtetërorë dhe kërkojnë koordinim rajonal.
k.jpg)