Nafta ulet në 196 lekë/litër, Bordi publikon çmimet e reja të karburanteve
Bordi i Transparencës ka vendosur uljen e çmimeve tavan për gazoilin dhe benzinën, me ndryshimet që hynë në fuqi këtë të mërkurë në mesditë.
Bordi i Transparencës publikoi këtë të mërkurë vendimin e ri për çmimet e karburanteve në vend, duke përcaktuar ulje të çmimeve për gazoilin dhe benzinën në tregun vendas.
Sipas vendimit të marrë në mbledhjen e datës 7 maj 2026, çmimi maksimal i shitjes me pakicë për gazoilin e standardit SSH EN 590 do të jetë 196 lekë për litër, ndërsa çmimi i shitjes me shumicë është vendosur në 184 lekë për litër.
Për benzinën, çmimi maksimal i shitjes me pakicë është përcaktuar në 180 lekë për litër, ndërsa çmimi i shumicës do të jetë 168 lekë për litër.
Çmimet hynë menjëherë në fuqi
Bordi bëri të ditur se çmimet e reja hynë në fuqi sot, më 7 maj, në orën 12:00 dhe do të mbeten të vlefshme deri në mbledhjen e ardhshme, ku do të reflektohen zhvillimet e reja në tregjet ndërkombëtare të karburanteve.
Autoritetet paralajmëruan operatorët e tregtimit me shumicë dhe pakicë për detyrimin e zbatimit të këtij vendimi, ndërsa në rast shkeljesh do të aplikohen masa deri në pezullim aktiviteti.
Akciza mbetet në nivel të plotë
Në sqarimin shoqërues të vendimit, Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë theksuan se çmimet aktuale mbeten nën kufijtë e përcaktuar nga Akti Normativ nr.1, datë 3 prill 2026.
Sipas këtij akti, ulja e akcizës në 80% zbatohet vetëm në rast se çmimi i gazoilit kalon 220 lekë për litër ose benzina tejkalon 200 lekë për litër. Duke qenë se çmimet aktuale janë poshtë këtyre niveleve, akciza do të vijojë të aplikohet në nivelin e plotë 100%.
k.jpg)