Qiratë e banesave rekord këtë vit, BSH: Janar-prill rritje me 7.8 për qind
Qiratë e banesave janë rritur me 7.8 për qind në katër muajt e parë të vitit, niveli më i lartë historik për këtë periudhë, ndërsa Banka e Shqipërisë paralajmëron se trendi pritet të vijojë.
Marrja e një apartamenti me qira po bëhet gjithnjë e më e kushtueshme në Shqipëri gjatë vitit 2026. Të dhënat e INSTAT tregojnë se qiratë janë një nga faktorët kryesorë që po ndikojnë në mbajtjen e inflacionit në nivele të larta.
Sipas statistikave zyrtare, në muajin prill çmimet e qirave rezultuan 7.1% më të larta krahasuar me të njëjtën periudhë të vitit të kaluar. Ndërsa për periudhën janar-prill, rritja mesatare arriti në 7.8%, niveli më i lartë historik për këtë periudhë.
Krahasuar me vitet e mëparshme, ritmet e rritjes janë përshpejtuar ndjeshëm. Në janar-prill 2024, qiratë u rritën me 4.4%, ndërsa në të njëjtën periudhë të vitit 2025 rritja ishte vetëm 1.6%.
Kërkesa e lartë dhe turizmi po shtyjnë tregun
Ekspertët e tregut të pasurive të paluajtshme vlerësojnë se tregu po përjeton një efekt zinxhir, ku blerja e apartamenteve për investim dhe dhënie me qira po ushqen më tej rritjen e çmimeve.
Sipas Bankës së Shqipërisë, një nga arsyet kryesore të shtrenjtimit është mungesa e apartamenteve për qira afatgjatë, pasi një pjesë e madhe e tyre janë kthyer në apartamente me qira ditore ose javore për turistët.
Rritja e numrit të turistëve dhe kërkesa e lartë për akomodim po redukton ofertën për familjet dhe individët që kërkojnë banesa me kontrata afatgjata, sidomos në Tiranë dhe zonat turistike.
Zhvlerësimi i euros po ndikon në çmimet e qirave
Banka e Shqipërisë evidenton edhe ndikimin e kursit të këmbimit në tregun e qirave. Me dobësimin e euros ndaj lekut, shumë pronarë kanë nisur të kalojnë kontratat e qirasë nga euro në lekë.
Ky konvertim ka sjellë automatikisht rritje të vlerës së qirasë në monedhën vendase, duke shtuar më tej presionin mbi qiramarrësit.
Agjentët e tregut pohojnë se kërkesa për apartamente me qira mbetet e lartë, edhe për prona me çmime të konsiderueshme, veçanërisht në kryeqytet.
Trendi pritet të vijojë edhe në muajt e ardhshëm
Sipas institucioneve dhe operatorëve të tregut, rritja e qirave nuk pritet të ndalet gjatë muajve në vijim, pasi efekti sezonal i turizmit dhe mungesa e ofertës për qira afatgjatë do të vazhdojnë të mbajnë presion mbi çmimet.
Ekspertët paralajmërojnë se kjo situatë po e bën gjithnjë e më të vështirë për familjet dhe të rinjtë sigurimin e një banese me qira me çmime të përballueshme.
k.jpg)