Numbeo: Kostoja e jetesës në Tiranë u rrit me rreth 60 për qind në pesë vite
Çmimet e qirave dhe produkteve bazë në Tiranë janë rritur ndjeshëm që nga viti 2021, ndërsa kostoja e jetesës po rëndon gjithnjë e më shumë buxhetet familjare.
Qiratë u rritën me 59 për qind në pesë vite
Tirana po përballet me një rritje të shpejtë të kostos së jetesës, ku çmimet po rriten më shpejt sesa të ardhurat e shumicës së qytetarëve. Sipas të dhënave të platformës Numbeo, qiratë dhe një pjesë e artikujve bazë të konsumit janë rritur me rreth 60 për qind gjatë pesë viteve të fundit.
Rritja më e fortë është shënuar në sektorin e qirave, i cili po konsiderohet si barra kryesore financiare për familjet dhe të rinjtë profesionistë. Të dhënat tregojnë se qiraja mesatare për një apartament me një dhomë gjumi në qendër të Tiranës është rritur nga 41,835 lekë në vitin 2021 në 66,656 lekë në vitin 2026, ose 59 për qind më shumë.
Sipas analizës, kjo rritje lidhet me kërkesën e lartë nga të huajt dhe turistët, si edhe me rritjen e çmimeve të pronave në tregun imobiliar.
Rritje të forta edhe në ushqime
Përveç kostos së strehimit, qytetarët po përballen edhe me shtrenjtimin e produkteve bazë të shportës. Sipas Numbeo, çmimi i 12 kokrrave vezë është rritur nga 204 lekë në vitin 2021 në 318 lekë në vitin 2026, ose 56 për qind më shumë.
Ndërkohë, një kilogram oriz i bardhë është rritur nga 129 lekë në 199 lekë, duke shënuar një rritje prej 54 për qind. Rritje çmimesh janë regjistruar edhe në sektorin e shërbimeve dhe restoranteve.
Edhe restorantet dhe kafeja më të shtrenjta
Kostoja e një vakti në një restorant ekonomik është rritur me 31 për qind, nga 611 lekë në vitin 2021 në 800 lekë në vitin 2026. Ndërsa çmimi i kafesë ose kapuçinos është rritur me rreth 28 për qind gjatë së njëjtës periudhë.
Sipas të dhënave, inflacioni ka ndikuar pothuajse në të gjitha kategoritë e konsumit në kryeqytet, duke përfshirë ushqimet, argëtimin, pajisjet shtëpiake dhe kostot e banimit.
k.jpg)