Forcimi i monedhës vendase u kushtoi depozituesve në valutë 22 mld lekë vitin e kaluar
Forcimi i lekut ndaj euros ka ulur vlerën e kursimeve në valutë, duke sjellë humbje për depozituesit gjatë vitit 2025.
Të dhënat e Bankës së Shqipërisë tregojnë se zhvlerësimi i euros ndaj lekut ka krijuar një efekt negativ statistikor në kundërvlerën në lekë të depozitave në valutë, megjithëse ndikimi ishte më i ulët krahasuar me vitin 2024.
Në vitin 2024, humbja e vlerës së depozitave në valutë nga kursi i këmbimit kishte arritur në rreth 43 miliardë lekë, ndërsa gjatë vitit 2025 kjo humbje u reduktua në 22 miliardë lekë për shkak të ngadalësimit të ritmit të forcimit të lekut.
Depozitat vijuan rritjen gjatë vitit 2025
Pavarësisht efektit negativ të kursit të këmbimit, depozitat bankare në vend vijuan të zgjerohen me ritme të larta gjatë vitit të kaluar.
Sipas Bankës së Shqipërisë, gjatë vitit 2025 depozitat u rritën me rreth 152 miliardë lekë ose 9.1%, duke arritur në fund të dhjetorit nivelin e 1.84 trilionë lekëve.
Rritja më e fortë e depozitave u regjistrua gjatë gjysmës së dytë të vitit, sidomos në muajin gusht, kur ekonomia përfitoi flukse të larta valutore nga sezoni turistik.
Depozitat në lekë u rritën me 11.5% në bazë vjetore, ndërsa ato në valutë me 6.9%.
Në total, depozitat në lekë u zgjeruan me rreth 90 miliardë lekë, duke regjistruar ritme më të larta rritjeje sesa depozitat në valutë.
Banka e Shqipërisë vlerëson se, nëse do të hiqej efekti statistikor i kursit të këmbimit, rritja reale e depozitave totale do të ishte 10.4%, ndërsa depozitat në valutë do të kishin një rritje prej rreth 9%.
Euro preku nivelin më të ulët historik
Kursi mesatar i këmbimit euro-lek vijoi rënien për të pestin vit radhazi gjatë vitit 2025, duke regjistruar nivelin më të ulët historik.
Sipas statistikave zyrtare, euro u këmbye mesatarisht me 97.85 lekë gjatë vitit të kaluar.
Megjithatë, ritmi i rënies ishte më i moderuar krahasuar me vitet e mëparshme.
Në vitin 2025, euro u zhvlerësua mesatarisht me 2.8% kundrejt lekut, ndërsa rënia kishte qenë 7.4% në vitin 2024 dhe 8.6% në vitin 2023.
Tendenca e forcimit të lekut ka vijuar edhe gjatë këtij viti, me kursin e euros që ka zbritur në nivele rekord poshtë 95.5 lekëve.
Që nga fillimi i vitit 2026, euro është zhvlerësuar me rreth 1.4%, ndërsa në bazë vjetore rënia ka arritur në 2.8%.
Depozituesit në valutë vijojnë të humbasin vlerë
Rënia e euros ndaj lekut përkthehet drejtpërdrejt në një ulje të vlerës në lekë të kursimeve të mbajtura në valutë, sidomos për depozituesit që mbajnë kursimet kryesisht në euro.
Ekspertët vlerësojnë se forcimi i monedhës vendase është ndikuar nga hyrjet e larta valutore nga turizmi, investimet e huaja, remitancat dhe përdorimi në rritje i lekut në ekonomi.
Megjithatë, për individët dhe bizneset që mbajnë kursime në valutë, kjo situatë ka sjellë një zhvlerësim të vazhdueshëm të depozitave të tyre kur maten në monedhën vendase.
k.jpg)