Euro bie përsëri, arrin rekord të ri në 95.32 lekë
Monedha europiane ka vijuar rënien në tregun vendas valutor, duke prekur sot nivelin më të ulët historik kundrejt Lekut.
Sipas kursit zyrtar të këmbimit të publikuar nga Banka e Shqipërisë, Euro u këmbye sot me 95.32 lekë, duke thyer minimumin e mëparshëm historik. Që nga fillimi i vitit 2026, Euro është zhvlerësuar me 1.5%, ndërsa në krahasim me të njëjtën periudhë të një viti më parë rënia ka arritur në 2.8%.
Oferta e lartë e valutës po shton presionin mbi Euron
Agjentët e tregut valutor shprehen se kursi i Euros vazhdon të përballet me presione rënëse për shkak të ofertës së lartë të valutës në tregun vendas.
Sipas tyre, ndërhyrjet e Bankës së Shqipërisë po arrijnë vetëm ta zbusin përkohësisht këtë tendencë, ndërsa pas pak ditësh tregu rikthen sërish presionin për zhvlerësimin e mëtejshëm të Euros. Kjo ka bërë që monedha europiane të regjistrojë vazhdimisht nivele të reja minimale historike, edhe pse lëvizjet ditore mbeten të kufizuara.
Turizmi po forcon Lekun gjatë sezonit veror
Tremujori i tretë i vitit ka shtuar më tej presionet mbi Euron, kryesisht për shkak të rritjes së ofertës valutore të lidhur me sezonin turistik. Ekspertët e tregut presin që Euro të vazhdojë të bjerë gjatë gjithë verës, ndërsa ritmi i rënies do të varet nga ndërhyrjet që do të vazhdojë të kryejë Banka e Shqipërisë në tregun valutor.
Sipas statistikave zyrtare, gjatë vitit të kaluar Banka e Shqipërisë bleu 1 miliard e 27 milionë euro për të rritur rezervën valutore dhe për të frenuar forcimin e Lekut. Sasia e blerë ishte 10% më e lartë krahasuar me një vit më parë.
Në total, gjatë periudhës 2024-2025, Banka Qendrore ka blerë rreth 2 miliardë euro në tregun valutor, ndërhyrje që sipas ekspertëve kanë shërbyer kryesisht për të ngadalësuar rënien e Euros. Blerjet e valutës kanë vijuar edhe gjatë muajve të parë të këtij viti, megjithatë Banka e Shqipërisë ende nuk ka publikuar të dhënat zyrtare për ndërhyrjet e fundit.
Inflacioni mund të kufizojë ndërhyrjet e Bankës së Shqipërisë
Ekspertët vlerësojnë se me inflacionin që po afrohet drejt objektivit prej 3%, Banka e Shqipërisë do ta ketë më të vështirë të justifikojë ndërhyrjet e mëtejshme në treg me argumentin e stabilitetit të çmimeve.
Nëse roli i Bankës së Shqipërisë në tregun valutor reduktohet, Euro mund të përballet me ritme edhe më të shpejta rënieje gjatë muajve në vijim. Megjithatë, deri tani nuk po shfaqen efekte të forta në kahun e kundërt nga rritja e çmimeve të mallrave të importit, faktor që teorikisht do të rriste kërkesën për valutë në treg.
k.jpg)