BE 49 mln euro për Shqipërinë nga Plani i Rritjes për Ballkanin Perëndimor
Bashkimi Europian ka disbursuar 49 milionë euro për Shqipërinë në kuadër të Planit të Rritjes për Ballkanin Perëndimor, duke mbështetur reformat ekonomike dhe afrimin gradual të vendit me tregun unik europian.
Komisioni Europian njoftoi të mërkurën çlirimin e një pakete totale prej 158.9 milionë eurosh për Shqipërinë, Malin e Zi dhe Maqedoninë e Veriut, pas vlerësimit pozitiv të reformave të ndërmarra nga tre vendet.
Shqipëria përfitoi 49 milionë euro, duke u renditur mes përfituesve kryesorë të paketës financiare, ndërsa fondet do të përdoren për mbështetjen e konkurrueshmërisë së biznesit, inovacionit dhe zgjerimin e aksesit në financim për sektorin privat.
Nga shuma totale, 22.8 milionë euro do të transferohen drejtpërdrejt në buxhetin e shtetit, ndërsa pjesa tjetër do të kanalizohet për projekte investimi përmes Kornizës së Investimeve për Ballkanin Perëndimor (WBIF), subjekt i miratimeve të mëtejshme nga institucionet europiane.
BE vlerëson reformat ekonomike
Komisioni Europian vlerësoi masat e ndërmarra nga qeveria shqiptare për përmirësimin e klimës së biznesit, lehtësimin e investimeve dhe mbështetjen e kompanive që operojnë në sektorët e gjelbër dhe digjital.
Sipas Brukselit, këto reforma synojnë krijimin e një ekonomie më konkurruese dhe më të integruar me standardet e Bashkimit Europian.
Pagesa përfaqëson këstin e tretë të Mekanizmit të Reformës dhe Rritjes, instrumentit financiar prej 6 miliardë eurosh që Bashkimi Europian ka miratuar për Ballkanin Perëndimor me synimin për të afruar ekonomitë e rajonit me tregun europian përpara anëtarësimit të plotë.
Shqipëria mes përfituesve kryesorë
Me disbursimin e fundit, fondet totale të përfituara nga Shqipëria në kuadër të këtij mekanizmi kanë arritur në 212.8 milionë euro.
Programi europian synon të mbështesë reforma strukturore dhe investime në energji të pastër, transport, infrastrukturë digjitale dhe zhvillim të kapitalit njerëzor.
Autoritetet europiane kanë theksuar se disbursimet e ardhshme do të varen nga progresi i mëtejshëm në zbatimin e reformave të dakorduara me Bashkimin Europian.
Për Shqipërinë, financimi vjen në një moment kur vendi po përpiqet të përshpejtojë negociatat e anëtarësimit dhe të avancojë procesin e integrimit europian.
k.jpg)