Bordi i Transparencës ka ulur sërish çmimet e karburanteve në tregun vendas, duke e çuar naftën në 197 lekë për litër, pesë lekë më pak krahasuar me një ditë më parë.
Sipas vendimit të marrë në mbledhjen e datës 21 maj 2026, çmimi maksimal i shitjes me pakicë për gazoilin e standardit SSH EN 590 është përcaktuar në 197 lekë për litër, ndërsa çmimi me shumicë në 185 lekë për litër.
Ndërkohë, benzina e standardit SSH EN do të tregtohet me jo më shumë se 186 lekë për litër në pakicë dhe 174 lekë për litër në shumicë.
Çmimet hynë në fuqi menjëherë
Bordi bëri të ditur se çmimet e reja kanë hyrë në fuqi sot, më 21 maj, në orën 13:00 dhe do të mbeten të vlefshme deri në mbledhjen e ardhshme, kur do të reflektohen luhatjet e reja të tregut ndërkombëtar.
Autoritetet paralajmëruan operatorët e tregut të karburanteve se janë të detyruar të zbatojnë vendimin, ndërsa në rast shkeljesh parashikohen masa administrative deri në pezullim aktiviteti.
Akciza mbetet në nivelin e plotë
Në sqarimin shoqërues, Bordi theksoi se çmimet aktuale mbeten nën kufijtë e përcaktuar në Aktin Normativ nr. 1, datë 3 prill 2026, i cili parashikon uljen e akcizës në 80 për qind vetëm në rast se nafta kalon 220 lekë për litër ose benzina 200 lekë për litër.
Me çmimet aktuale, akciza do të vazhdojë të aplikohet në nivelin e plotë prej 100 për qind.
k.jpg)