Protesta studentore në Serbi, Vuçiç: Mund të jap dorëheqjen së shpejti

Presidenti serb nuk përjashtoi dorëheqjen mes tensioneve nga protestat studentore.

Presidenti i Serbisë, Aleksandar Vuçiç, deklaroi nga Kina, ku ndodhet për një vizitë zyrtare, se nuk e përjashton mundësinë e dorëheqjes ndërsa mandati i tij po shkon drejt fundit. Reagimi i tij vjen pas protestës së madhe studentore të mbajtur në Beograd, e cila u mbështet nga dhjetëra mijëra qytetarë dhe u shoqërua me përplasje me policinë.

Përplasjet gjatë protestës

Ministri i Brendshëm i Serbisë, Ivica Daçiç, deklaroi se nga protesta e së shtunës kanë mbetur të lënduar 17 policë, ndërsa 47 persona janë shoqëruar në ambientet e Ministrisë së Brendshme. Sipas tij, një prej të ndaluarve posedonte kartë identiteti diplomatike. Përplasjet nisën pranë Parkut Pionirski, ku ishin mbledhur mbështetësit e presidentit Vuçiç.

Nën sloganin “Studentët fitojnë”, lëvizja studentore kishte ftuar qytetarët nga i gjithë vendi të mblidheshin në Sheshin Slavija në qendër të Beogradit, nga ora 18:00 deri në 20:00. Në të njëjtin shesh, më 15 mars të vitit të kaluar, u zhvilluan demonstratat më të mëdha antiqeveritare në historinë moderne të Serbisë. Protestat u nxitën fillimisht nga tragjedia e 1 nëntorit 2024 në Novi Sad, ku nga shembja e një strehe humbën jetën 16 persona.

Vuçiç: Mund të jap dorëheqje

Vuçiç tha se do të vazhdojë t’i ftojë protestuesit në dialog dhe se nuk i ndalon përpjekjet për komunikim politik, por shtoi se mandati i tij po përfundon. “Po, kam mbaruar, mandati po më përfundon së shpejti! Është e mundur që së shpejti të jap dorëheqje. Gënjeshtrave dhe teorive të konspiracionit nuk u vjen fundi”, deklaroi presidenti serb.

Ai mohoi pretendimet për “elemente të infiltruar” në protesta, por akuzoi faktorë të ndryshëm për përpjekje të organizuara kundër shtetit serb. Sipas Vuçiçit, “janë investuar miliarda euro për rrëzimin e Serbisë”, duke përfshirë media, organizata politike dhe parapolitike, OJQ dhe sindikata.

Daçiç përjashton dorëheqjen

Megjithëse protesta në Sheshin Slavija përfundoi paqësisht rreth orës 20:00, tensionet vazhduan më pas me përplasjen e një grupi protestuesish me policinë që siguronte tubimin paralel të mbështetësve të Vuçiçit. Ministri Ivica Daçiç deklaroi të dielën se në Ministrinë e Brendshme nuk po diskutohet për dorëheqje, por për identifikimin e përgjegjësve për incidentet.

“Pse do të ofroja dorëheqjen për këtë? Nuk mbaj asnjë përgjegjësi dhe nuk kam marrë pjesë në këto vepra penale”, tha Daçiç për TV Prva. Ai shtoi se drejtimin operacional të policisë e ka drejtori i policisë dhe jo ministri. Daçiç deklaroi gjithashtu se ende po rikuperohet nga problemet shëndetësore dhe se do të vazhdojë të ushtrojë funksionet shtetërore për aq kohë sa do të jetë në gjendje.

Presioni për zgjedhje të parakohshme

Lidhur me mundësinë e zgjedhjeve të reja, Daçiç tha se mbështet zgjedhjet e rregullta dhe se afatet për mbajtjen e tyre janë të përcaktuara qartë. Ai theksoi se në disa vende nuk ekziston fare mundësia e zgjedhjeve të jashtëzakonshme.

Që prej 1 nëntorit 2024, protestat në Serbi kanë vazhduar pa ndërprerje, duke arritur kulmin më 15 mars 2025 me rreth 300 mijë pjesëmarrës. Studentët shpresojnë që protesta e fundit të rigjallërojë lëvizjen dhe të shtojë presionin ndaj Vuçiçit për shpalljen e zgjedhjeve të parakohshme.

Burimi: Ora News

Më të lexuarat