Fitimet e pashpërndara të sektorit bankar arrijnë vlerën më të lartë historike

26-05-2026

Fitimet e pashpërndara të sektorit bankar shqiptar kanë arritur nivelin më të lartë historik në tremujorin e parë të vitit 2026, duke reflektuar përmirësimin e fortë të performancës financiare dhe kapitalizimin e lartë të bankave.

Sipas të dhënave të Bankës së Shqipërisë, vlera e fitimeve të pashpërndara të bankave tregtare, pa përfshirë fitimet e vitit në vazhdim, arriti në 82.9 miliardë lekë, ose rreth 863 milionë euro në fund të muajit mars.

Kjo vlerë është rreth 13 për qind më e lartë krahasuar me të njëjtën periudhë të një viti më parë, duke shënuar një rekord të ri për sistemin bankar shqiptar.

Rritet pesha në kapitalin aksionar

Edhe pesha e fitimeve të pashpërndara në strukturën e kapitalit aksionar të sektorit bankar arriti nivelin më të lartë të regjistruar ndonjëherë.

Në fund të tremujorit të parë, fitimet e pashpërndara përbënin 32.5 për qind të kapitalit aksionar të sektorit, me një rritje prej 1.5 pikë përqindje krahasuar me të njëjtën periudhë të vitit të kaluar.

Ky zhvillim konsiderohet një tregues i rëndësishëm për qëndrueshmërinë financiare të bankave, pasi u krijon atyre rezerva të brendshme për të përballuar goditje të mundshme ekonomike apo financiare pa pasur nevojë për injektim kapitali nga aksionarët.

Nga humbjet e kredive me probleme te rikthimi në fitime

Rritja e fitimeve të pashpërndara në vitet e fundit përmbys një periudhë të gjatë negative që pasoi krizën e kredive me probleme.

Nga qershori 2011 deri në shtator 2018, humbjet e akumuluara kishin ndikim negativ në kapitalin e sektorit bankar. Situata arriti pikën më të vështirë në fund të vitit 2014, kur humbjet e akumuluara përbënin afro 25 për qind të kapitalit aksionar të sistemit.

Përkeqësimi i performancës financiare në atë periudhë u ndikua kryesisht nga rritja e fortë e kredive me probleme.

Pas vitit 2018, përmirësimi gradual i cilësisë së portofolit të kredisë dhe rikthimi i fitueshmërisë sollën një kthesë të fortë pozitive për sektorin bankar.

Normat e interesit dhe kufizimet për dividendët

Sipas Bankës së Shqipërisë, rritja e fitimeve të pashpërndara lidhet ngushtë me performancën e përmirësuar financiare të bankave dhe veçanërisht me efektin e rritjes së normave të interesit pas vitit 2022.

Megjithatë, një pjesë e konsiderueshme e këtyre fitimeve nuk është shpërndarë si dividend për aksionarët për shkak të kërkesave më të forta rregullatore të Bankës së Shqipërisë.

Kuadri i ri makroprudencial dhe rregullat për rimëkëmbjen bankare kanë rritur ndjeshëm kërkesat për kapital, duke i detyruar bankat të mbajnë rezerva më të larta financiare.

Raporti minimal bazë i mjaftueshmërisë së kapitalit për sektorin bankar është 12 për qind, por me shtesat konservuese dhe kërkesat e tjera rregullatore, ky nivel arrin aktualisht në 15.5 për qind.

Bankat sistemike me kërkesa më të larta

Për bankat me rëndësi sistemike, kërkesat janë edhe më të forta. Banka Kombëtare Tregtare, Credins Bank, Raiffeisen Bank dhe Intesa Sanpaolo Bank kanë shtesa shtesë të kapitalit nga 0.5 deri në 1 për qind.

Po ashtu, që nga 1 janari 2024, bankat sistemike duhet të plotësojnë edhe kërkesat MREL, që lidhen me instrumentet minimale të kapitalit dhe detyrimeve të pranueshme për përballimin e krizave financiare.

Në fund të marsit 2026, raporti i mjaftueshmërisë së kapitalit për sektorin bankar arriti në 20.44 për qind, nga 20.36 për qind në fund të vitit 2025 dhe 19.5 për qind në të njëjtën periudhë të një viti më parë.

Burimi: Monitor