Shtrenjtohen sërish çmimet e karburanteve, nafta arrin 198 lekë për litër
Rritja e çmimeve të karburanteve po vijon, me naftën që ka arritur në 198 lekë për litër.
Pak javë pas shkrirjes së Bordit të Transparencës, çmimet e karburanteve në tregun vendas kanë vijuar rritjen. Ditën e sotme, nafta po tregtohet deri në 198 lekë për litër në pikat e karburantit me pakicë, ndërsa benzina ka arritur në 189 lekë për litër. Brenda pak ditësh, çmimi i naftës është rritur me 10 lekë për litër, ndërsa ai i benzinës me 5 lekë për litër.
Ditën e premte, nafta tregtohej me 188 lekë për litër, nga 176 lekë për litër që ishte në mesin e muajit qershor, kur qeveria vendosi ndërprerjen e funksionimit të Bordit të Transparencës, duke shënuar një rritje prej 12 lekësh për litër. Edhe benzina u rrit në 184 lekë për litër, nga 166 lekë për litër që ishte çmimi i vendosur me vendimin e fundit të Bordit, me një rritje totale prej 18 lekësh për litër.
Tensionet në Lindjen e Mesme ndikojnë tregun
Shoqata e Hidrokarbureve pohon se përshkallëzimi i tensioneve në Lindjen e Mesme ka rikthyer shqetësimet për furnizimin global me naftë, duke shtuar rrezikun në tregjet ndërkombëtare dhe duke ndikuar në rritjen e çmimeve të naftës me shumicë. Në bursat ndërkombëtare, çmimi i naftës Platts ka arritur në 1,198 USD për ton, ndërsa nafta “Brent Crude” tregtohet me 85 USD për fuçi, nga 76 USD për fuçi që ishte ditën e premte.
Vendimi për shkrirjen e Bordit të Transparencës
Në mesin e muajit qershor, ministrja e Ekonomisë dhe Inovacionit, Delina Ibrahimaj, njoftoi vendimin e qeverisë për ndërprerjen e funksionimit të Bordit të Transparencës, me argumentin se çmimet e karburanteve kishin qenë në rënie për dy javë radhazi.
Bordi i Transparencës u krijua më 23 mars 2026, në kulmin e krizës së çmimeve të karburanteve pas nisjes së luftës në Lindjen e Mesme. Me vendimin e parë, çmimi i naftës u ul nga 214 lekë në 203 lekë për litër, por pas kundërshtimeve të importuesve, të cilët paralajmëruan ndërprerje të furnizimit, vetëm dy ditë më vonë Bordi e rriti çmimin në 218 lekë për litër.
Ndërhyrja e qeverisë me uljen e akcizës
Përveç krijimit të Bordit të Transparencës, qeveria ndërhyri edhe me një akt normativ që parashikonte uljen e akcizës me 20 për qind në rastet kur çmimi i naftës kalonte 220 lekë për litër dhe ai i benzinës 200 lekë për litër. Sipas ministrit të Financave, Petrit Malaj, kjo masë është zbatuar vetëm dy herë, me një efekt financiar prej rreth 37 milionë lekësh, ose afërsisht 390 mijë euro.
k.jpg)