Depozitimi i energjisë, ERE u kërkon operatorëve të impianteve të regjistrohen brenda 60 ditëve
Enti Rregullator i Energjisë ka kërkuar që operatorët e impianteve të depozitimit të energjisë të regjistrohen pranë institucionit brenda 60 ditëve nga hyrja në fuqi e ligjit të ri për sektorin e energjisë elektrike.
Enti Rregullator i Energjisë (ERE) u ka bërë thirrje operatorëve të impianteve të depozitimit të energjisë që të njoftojnë dhe të regjistrohen pranë institucionit brenda afatit 60-ditor, në zbatim të ligjit nr. 59/2026 “Për sektorin e energjisë elektrike”. Detyrimi u drejtohet subjekteve që, në momentin e hyrjes në fuqi të ligjit, kanë impiante të depozitimit të energjisë në zhvillim ose në operim, por nuk disponojnë një licencë të veçantë për këtë aktivitet.
Sipas njoftimit të ERE, kërkesa mbështetet në nenin 51, pikat 3 dhe 5, të ligjit të ri, i cili përcakton rregullat për regjistrimin dhe licencimin e operatorëve të impianteve të depozitimit të energjisë.
Licenca duhet të merret brenda 12 muajve
Ligji parashikon se aktiviteti i depozitimit të energjisë mund të ushtrohet vetëm nga persona fizikë ose juridikë të pajisur me licencë për operimin e impiantit përkatës, përveç rasteve kur parashikohet ndryshe.
Për impiantet që ishin në zhvillim ose në operim në momentin e hyrjes në fuqi të ligjit dhe funksiononin pa një licencë të posaçme, aktiviteti mund të vazhdojë mbi bazën e licencës ekzistuese. Megjithatë, operatorët janë të detyruar të aplikojnë për licencën specifike të operimit brenda 12 muajve nga hyrja në fuqi e ligjit.
ERE ka të drejtë të miratojë procedura të thjeshtuara licencimi për këto raste, me synimin për të lehtësuar procesin e pajisjes me licencë.
ERE mund të kërkojë dokumentacion shtesë
Pas marrjes së njoftimit për regjistrim, Enti Rregullator i Energjisë mund t'u kërkojë operatorëve informacion ose dokumentacion shtesë, nëse kjo konsiderohet e nevojshme për regjistrimin dhe administrimin e Regjistrit të Impianteve të Depozitimit të Energjisë.
Operatorët duhet gjithashtu të respektojnë të gjitha standardet ligjore, teknike, të sigurisë dhe operacionale që zbatohen për subjektet e licencuara në këtë sektor.
Rregulla të veçanta për kompanitë shtetërore
Në rastet kur operatori i impiantit është një kompani e kontrolluar plotësisht ose pjesërisht nga shteti, ligji përcakton se Këshilli i Ministrave duhet të caktojë autoritetin publik që do të përfaqësojë shtetin si pronar të aksioneve.
Sipas nenit 51 të ligjit, ky autoritet duhet të jetë i pavarur nga pronari i sistemit të transmetimit, me qëllim garantimin e ndarjes së funksioneve dhe respektimin e parimeve të pavarësisë në sektorin energjetik.
ERE u ka bërë thirrje të gjitha subjekteve që plotësojnë kushtet e ligjit të respektojnë afatin 60-ditor për regjistrim dhe të nisin në kohë procedurat për pajisjen me licencën përkatëse.
k.jpg)