Dyfishohet kafja e importuar në qershor, rriten edhe mallrat e tjera të akcizës
Importet e mallrave kryesore të akcizës kanë ndjekur ritme të ndryshme gjatë gjashtëmujorit të parë të vitit 2026. Kafeja dhe cigaret shënuan rritje, ndërsa karburantet dhe birra u tkurrën në totalin e periudhës.
Të dhënat e Ministrisë së Financave tregojnë se importet e mallrave kryesore të akcizës kanë pasur zhvillime të ndryshme gjatë gjashtëmujorit të parë të vitit. Ndërsa karburantet dhe birra kanë regjistruar rënie krahasuar me një vit më parë, importet e cigareve janë rritur, ndërsa kafeja ka shënuar zgjerimin më të fortë.
Karburantet vijojnë të përbëjnë pjesën më të madhe të importeve të mallrave të akcizës. Deri në fund të qershorit janë importuar 332,142 ton, nga 345,202 ton në të njëjtën periudhë të vitit 2025, duke shënuar një rënie prej 3.8%, ose rreth 13 mijë ton më pak.
Kafeja dhe cigaret në rritje
Importi i cigareve vijoi trendin pozitiv edhe gjatë këtij viti. Në gjashtëmujor u importuan 1,689 ton, kundrejt 1,509 tonëve në të njëjtën periudhë të vitit të kaluar, duke shënuar një rritje prej 11.9%.
Edhe importet e kafesë u zgjeruan ndjeshëm. Në gjashtë muajt e parë të vitit në vend hynë 5,392 ton kafe, nga 4,760 ton një vit më parë, ose 13.3% më shumë, duke përfaqësuar rritjen më të fortë ndër mallrat kryesore të akcizës.
Birra mbetet në rënie në gjashtëmujor
Në të kundërt, importi i birrës shënoi tkurrje gjatë periudhës janar–qershor. Deri në fund të muajit u importuan 25.48 milionë litra, nga 26.25 milionë litra në të njëjtën periudhë të vitit 2025, ose rreth 2.9% më pak.
Qershori solli rritje të fortë të importeve
Vetëm për muajin qershor, importet e karburanteve arritën në 69,003 ton, nga 65,964 ton në qershor të vitit të kaluar, duke regjistruar një rritje prej 4.6%.
Edhe cigaret shënuan rritje mujore. Gjatë qershorit u importuan 356 ton, krahasuar me 332 ton në të njëjtin muaj të vitit 2025, ose 7.2% më shumë.
Rritjen më të fortë e regjistroi kafeja. Gjatë qershorit u importuan 1,520 ton, nga vetëm 777 ton në të njëjtin muaj të vitit të kaluar, duke shënuar një rritje prej rreth 95.6% dhe pothuajse duke dyfishuar sasinë e importuar.
Edhe birra pati një performancë pozitive gjatë muajit qershor, pavarësisht rënies në totalin e gjashtëmujorit. Importet arritën në 7.498 milionë litra, nga 7.335 milionë litra një vit më parë, duke u rritur me 2.2%.
k.jpg)