Rama prezanton programin Dyfisho Sipërmarrjen Tënde, kredi deri në 200 mln lekë për bizneset
Kryeministri Edi Rama ka prezantuar Programin Kombëtar “Dyfisho Sipërmarrjen Tënde”, një skemë e re financimi që synon të lehtësojë aksesin e ndërmarrjeve mikro, të vogla dhe të mesme në kredi me interesa preferenciale dhe garanci sovrane.
Përmes një videoje të publikuar në rrjetet sociale, kreu i qeverisë bëri të ditur se bizneset shqiptare mund të aplikojnë për financim deri në 200 milionë lekë për investime në zgjerimin e aktivitetit, blerjen e pajisjeve, teknologji të reja dhe automatizim.
Kredi deri në 200 milionë lekë
Sipas njoftimit të kryeministrit, programi u ofron bizneseve mundësinë të përfitojnë kredi deri në 200 milionë lekë, me normë interesi preferenciale nga 2 deri në 3 për qind dhe me afat shlyerjeje deri në 10 vjet.
Financimi synon të mbështesë investimet në pajisje, zgjerimin e kapaciteteve prodhuese, automatizimin e proceseve dhe adoptimin e teknologjive të reja.
Për cilët sektorë është i hapur programi
Programi është i hapur për fermerët, prodhuesit, bizneset që operojnë në sektorin e turizmit, transportit dhe teknologjisë, si edhe për të gjitha ndërmarrjet mikro, të vogla dhe të mesme që planifikojnë të zgjerojnë aktivitetin e tyre.
Sipas njoftimit, bizneset e interesuara mund të aplikojnë deri më 20 nëntor 2027.
Skemë me garanci sovrane
Në mesazhin shoqërues të videos, kryeministri Edi Rama thekson se Programi Kombëtar “Dyfisho Sipërmarrjen Tënde” krijon mundësi të reja financimi për sipërmarrjet shqiptare përmes normave preferenciale të interesit dhe Garancisë Sovrane.
Programi është konceptuar si një instrument i ri financiar i Qeverisë Shqiptare, me synimin për të lehtësuar aksesin e ndërmarrjeve të vogla dhe të mesme në financim dhe për të nxitur investimet në sektorët prioritarë të ekonomisë.
k.jpg)