Tatimet raportojnë 127 biznese të dëmtuara nga protestat në Tiranë, me humbje materiale prej 2.15 milionë eurosh.

Administrata Tatimore ka identifikuar deri më tani 127 biznese të dëmtuara gjatë protestave të ditëve të fundit në Tiranë, ndërsa vlera totale e dëmeve materiale të evidentuara arrin në 2.15 milionë euro. Të dhënat janë publikuar nga Drejtoria e Përgjithshme e Tatimeve, e cila po vijon procesin e evidentimit dhe vlerësimit të dëmeve të shkaktuara në njësitë tregtare.

Nga 127 subjektet e identifikuara, 55 janë evidentuar përmes verifikimeve të kryera në terren nga administrata tatimore, ndërsa 72 biznese të tjera kanë raportuar dëmet përmes shërbimit elektronik “Dëmi im”.

Sipas Tatimeve, procesi i evidentimit dhe vlerësimit të dëmeve vijon si nëpërmjet kontrolleve në terren, ashtu edhe përmes shqyrtimit të raportimeve të paraqitura nga subjektet e prekura. Qëllimi është përditësimi dhe saktësimi i të dhënave mbi dëmet materiale të shkaktuara në ambientet dhe njësitë tregtare gjatë protestave.

Tatimet u bëjnë thirrje bizneseve të raportojnë dëmet përmes e-Albania

Drejtoria e Përgjithshme e Tatimeve u ka bërë thirrje të gjitha bizneseve të prekura që të përdorin shërbimin e dedikuar “Dëmi im”, të disponueshëm në portalin e-Albania, për të raportuar dëmet e shkaktuara në aktivitetin e tyre ekonomik.

Ky shërbim u mundëson subjekteve të paraqesin elektronikisht raportimet për dëmet e pësuara, të cilat më pas shqyrtohen nga administrata tatimore në kuadër të procesit të evidentimit dhe verifikimit.

Dëmet janë shkaktuar gjatë protestave të zhvilluara ditët e fundit në kryeqytet, ku janë dëmtuar ambiente dhe njësi tregtare, duke u shkaktuar bizneseve humbje materiale.

Meqenëse procesi i verifikimit është ende në vijim, numri i bizneseve të prekura dhe vlera totale e dëmeve mund të përditësohen pas përfundimit të kontrolleve në terren dhe shqyrtimit të raportimeve të tjera.

Burimi: Monitor