Kryeministri Edi Rama dhe Sekretari i Përgjithshëm i NATO-s, Mark Rutte, diskutuan sigurinë euroatlantike dhe projektet strategjike të mbrojtjes.

Kryeministri Edi Rama ka zhvilluar sot një takim me Sekretarin e Përgjithshëm të NATO-s, Mark Rutte, gjatë të cilit është rikonfirmuar mbajtja në Tiranë e Samitit të ardhshëm të Aleancës, në vijim të vendimit të marrë nga vendet aleate.

Në qendër të diskutimeve ishin sfidat aktuale të sigurisë euroatlantike, forcimi i bashkëpunimit strategjik ndërmjet vendeve anëtare dhe roli i Shqipërisë në përmbushjen e prioriteteve të përbashkëta të mbrojtjes.

Vëmendje e veçantë iu kushtua bashkërendimit me NATO-n për përballimin e kërcënimeve hibride, përfshirë sulmet kibernetike, dezinformimin, ndërhyrjet e huaja dhe mbrojtjen e infrastrukturës kritike. Këto sfida kërkojnë një koordinim gjithnjë e më të ngushtë ndërmjet vendeve aleate.

Korridori VIII dhe Porto Romano, në fokus të bashkëpunimit me NATO-n

Një nga çështjet kryesore të takimit ishte zhvillimi i Korridorit VIII si korridor i mobilitetit ushtarak, që lidh Adriatikun me Detin e Zi. Ky projekt konsiderohet i rëndësishëm për përmirësimin e lëvizshmërisë së forcave ushtarake, gatishmërisë operacionale dhe sigurisë së krahut juglindor të NATO-s.

Në këtë kuadër, Rama dhe Rutte diskutuan edhe rëndësinë e projektit të Porto Romanos për zhvillimin e kapaciteteve infrastrukturore dhe logjistike në mbështetje të nevojave strategjike të Aleancës.

Zhvillimi i këtyre projekteve lidhet me forcimin e infrastrukturës së transportit dhe logjistikës, si dhe me përmirësimin e kapaciteteve për lëvizjen dhe mbështetjen e forcave aleate në rajon.

Samiti i NATO-s në Tiranë, rikonfirmohet vendimi i vendeve aleate

Gjatë takimit u rikonfirmua gjithashtu organizimi në Tiranë i Samitit të radhës të NATO-s, në zbatim të vendimit të marrë më parë nga vendet anëtare të Aleancës.

Mbajtja e këtij samiti përbën një zhvillim të rëndësishëm për Shqipërinë, e cila do të mirëpresë forumin më të lartë politik të NATO-s, ku diskutohen çështjet kryesore të sigurisë kolektive dhe prioritetet strategjike të vendeve aleate.

Në një mjedis ndërkombëtar të karakterizuar nga pasiguri të shtuara dhe sfida gjeopolitike, organizimi i samitit në Tiranë pritet të vendosë Shqipërinë dhe Ballkanin Perëndimor në qendër të diskutimeve për të ardhmen e sigurisë euroatlantike.

Takimi Rama-Rutte riafirmoi angazhimin e Shqipërisë për forcimin e partneritetit transatlantik, përmbushjen e detyrimeve si vend anëtar dhe kontributin në rritjen e kapaciteteve mbrojtëse të NATO-s.

Burimi: Scan