Pas kritikes nga BE, ndryshon ligji per shoqerite tregtare
Hyjnë në fuqi ndryshimet e bëra në ligjin “Për tregtarët dhe shoqëritë tregtare”. Me këtë ndërhyrje synohet bashkërendimi i masave mbrojtëse për interesat e pronarëve dhe mbrojtjen e palëve të treta në një transaksion tregtar, në rastet e pavlefshmërive të themelimit të shoqërive tregtare, pasojat në këto raste për palët e treta në mirëbesim, si dhe përcaktimin e afateve të parashkrimit të padive përkatëse.
Ligji është në përputhje me direktivën e BE-së në lidhje me kërkesat për raportimin dhe dokumentimin në rastin e bashkimit apo të ndarjes së shoqërive tregtare. Puna për procesin e reformës së ligjit për shoqëritë tregtare ka filluar në muajin tetor 2006, me reformën për regjistrimin e shoqërive tregtare, që u përfundua me miratimin e ligjit, “Për Qendrën Kombëtare të Regjistrimit”, e duke vazhduar më tej, me ligjin “Për tregtarët dhe shoqëritë tregtare”, të 2008-s dhe ligjin “Për marrjen në kontroll të shoqërive me ofertë publike” të 2010-s.
Gjithsesi, në raport-progresin e Komisionit Europian për të drejtën për shoqëritë tregtare vihet në dukje mungesa e përafrimit të legjislacionit shqiptar me direktivën e dytë të KE-së lidhur me krijimin e shoqërive publike, me përgjegjësi të kufizuara, mbajtjen dhe ndryshimin e kapitalit të tyre, me qëllim për t’i bërë këto masa mbrojtëse ekuivalente.
Ndryshimet që hyjnë në fuqi dy javë pas botimit zyrtar të ligjit, parashikojnë ndarjen e kapitalit të një sh.p.k-je sipas numrit të ortakëve dhe të drejtat e votës të lidhura me kuotën e tyre. Parashikohet se administratori në çdo kohë mund të heqë dorë nga detyra e tij, duke njoftuar QKR-në, e cila deri tani nuk e regjistronte dorëheqjen e administratorit pa pasur një vendim të asamblesë për zëvendësimin e tij.
Gjithashtu, ligji ndan personalitetin juridik të shoqërisë nga personaliteti i ortakëve apo aksionerëve të shoqërisë. Kjo ndarje kufizon rrezikun e përgjegjësive që ortakët apo aksionerët e një shoqërie, qoftë sh.a. apo sh.p.k., mund të ketë në një investim jo rentabël, duke parashikuar se përgjegjësia e tyre personale për detyrimet ndaj shoqërisë tregtare të shtrihet deri në pjesën e pashlyer të kontributeve të nënshkruara./ Gazeta Shqip
