Deri ne 1 mars bizneset duhet te perditesojne kodet ekonomike

Drejtoria e Përgjithshme e Tatimeve ka vënë datën 1 mars 2015 si afatin e fundit që të gjitha bizneset të përditësojnë të dhënat pranë QKR-së. Për biznesin e vogël, sipas Drejtorisë së Tatimeve, nëse nuk përditëson të dhënat do të gjobitet me 10 mije lekë të reja. Tatimpaguesit e tjerë gjobiten në shumën 15 000 lekë. Po ashtu kur konstatohet mosinstalim herën e pare, gjoba do të jetë 50 000 lekë.

Administrata Tatimore u ka rikujtuar bizneseve të bëjnë përditësimin e adresave kryesore dhe sekondare, si dhe përditësiminin e kodeve ekonomike pranë Qëndrës Kombëtare të Regjistrimit (QKR). Afati për përditësimin e të dhënave pranë QKR-së është data 01 mars 2015. Në bazë të ligjit “Për Procedurat Tatimore në Republikën e Shqipërisë” Nr.9920, datë 19.5.2008 i ndryshuar, kur organet tatimore konstatojnë se tatimpaguesit nuk respektojnë kërkesat lidhur me përditësimin e të dhënave, i dënon ata me gjobë 10 000 lekë për biznesin e vogël dhe 15 000 lekë për tatimpaguesit e regjistruar si subjekte të tatimit mbi fitimin.

Gjithashtu në rast se administrata tatimore konstaton se subjekti ushtron aktivitet në adresë të padeklaruar, atëherë merret masë deri në konfiskim të mallit.

Dënimet Administrative për pajisjet fiskale
Administrata Tatimore ju rikujton se ndryshimet në Ligjin “Për Procedurat Tatimore në Republikën e Shqipërise” Nr.9920, datë 19.05.2008 i ndryshuar, të hyra në fuqi në datë 30.12.2014 parashikojnë gjobë nëse konstatohen parregullsi në instalimin dhe përdorimin e pajisjeve fiskale.
• Herën e parë të konstatimit të mosinstalimit të pajisjes fiskale, gjobë në masën 50 000 lekë;
• Nëse pas verifikimit të parë konstatohet se tatimpaguesi vazhdon të mos e instalojë pajisjen fiskale për regjistrimin e pagesave me para në dorë, ose sistemin e monitorimit të qarkullimit, dënohet me konfiskim të të gjithë sasisë së mallit;
• Cdo konstatim i mëpasshëm i mosinstalimit të pajisjes fiskale ose sistemit të monitorimit të qarkullimit, si shkelje e përsëritur, konsiderohet evazion tatimor dhe administrata tatimore bën kallëzim penal për tatimpaguesin;
Në rast konstatimi për mos lëshim kuponi tatimor për qarkullimin e realizuar të mallrave apo të shërbimeve ju gjobiteni:
• Për çdo konstatim të kryer, me gjobë në masën 200 000 lekë për tatimpaguesit e regjistruar si subjekte të tatimit mbi fitimin, dhe gjobë, në masën 50 000 lekë për tatimpaguesit e tjerë;
• Për çdo konstatim tjetër pas verifikimit të parë, ku konstatohet se tatimpaguesi vazhdon të mos e lëshojë kuponin tatimor për të dokumentuar qarkullimin e realizuar të mallrave apo të shërbimeve, i nënshtrohet një dënimi administrativ me gjobë në masën 300 000 lekë për tatimpaguesit e regjistruar si subjekte të tatimit mbi fitimin dhe gjobë, në masën 100 000 lekë për tatimpaguesit e tjerë
• Për çdo konstatim të përsëritur të moslëshimit të kuponit tatimor, pas aplikimit të dy dënimeve administrative konsiderohet evazion tatimor dhe administrata tatimore ushtron të drejtën të bëjë kallëzim penal për tatimpaguesin.

Dënimet administrative për mosdeklarimin e punonjësve.
Nëse nga verifikimi dhe kontrolli në vendndodhjen e biznesit tuaj rezulton se ju si tatimpagues nuk keni të deklaruar në organin tatimor çdo të punësuar, që fillon punë për herë të parë te tatimpaguesi apo të punësuar rishtazi pranë tij, të paktën një ditë kalendarike përpara fillimit të punës (përfshirë dhe punonjësit e papaguar të familjes së të vetëpunësuarit me të cilët ai punon e bashkëjeton), përveç detyrimit për pagimin e shumës së detyrimeve tatimore dhe kontributeve të papaguara të sigurimeve shoqërore e shëndetësore, detyroheni të paguani gjobë 250 000 lekë për çdo rast mosdeklarimi.
Nëse jeni tatimpagues i regjistruar njëkohësisht për tatimin mbi vlerën e shtuar dhe tatimin mbi fitimin, detyroheni të paguani gjobë prej 500 000 për çdo rast mosdeklarimi.

Më të lexuarat