Administratoret e pallateve do te pajisen me licence nga qeveria

Biznesi i administrimit të pallateve do të regjistrohet dhe licencohet. Ky proces do të zgjasë dy vjet, afat që vendoset për plotësimin e kushteve dhe kritereve.

Pa u mbushur një vit nga udhëzimi i tetorit 2014, ministrja e Zhvillimit Urban, Eglantina Gjermeni, ka firmosur më 19 maj 2015, një urdhër të ri që e shfuqizon të parin. Moszbatimi në praktikë i ligjit “Për administrimin e bashkëpronësisë në ndërtesat e banimit”, e ka detyruar ministrinë që të marrë vetë disa kompetenca. Njësitë vendore urdhërohen të bëjnë menjëherë regjistrimin në një libër të administratorëve ekzistues dhe të atyre që duan të hyjnë në këtë aktivitet.

Për periudhën 2-vjeçare nga hyrja në fuqi e këtij udhëzimi, personat fizikë dhe juridikë lejohet të regjistrohen në librin e administruesve, pa plotësuar kushtin e kryerjes së kursit të formimit profesional për administrimin e bashkëpronësisë në ndërtesat e banimit, por duhet të kenë përmbushur kriteret e tjera.

Brenda dy vjetëve, personat fizikë dhe individët e punësuar nga personat juridikë, përgjegjës për administrimin e godinave të banimit, duhet të pajisen me certifikatën e kryerjes së kursit profesional. Pas afatit 2-vjeçar, këta persona duhet të aplikojnë sërish për konfirmimin e regjistrimit. Në mungesë të certifikatës, emrat e tyre do të hiqen automatikisht nga libri i administruesve.

Kriteret
Sipas udhëzimit, veprimtaria e administrimit të ndërtesave për banim mund të kryhet vetëm nga personat e regjistruar në librin e administruesve, të mbajtur nga njësia e qeverisjes vendore. Për t’u regjistruar, personat fizikë duhet të mos jenë dënuar penalisht.
Lidhur me arsimin, vihet si kusht minimal që kandidati për administrator të ketë kryer arsimin e mesëm të përgjithshëm ose profesional. Përpara regjistrimit, kandidati duhet të jetë regjistruar në regjistrin tregtar në QKR me objekt veprimtarie administrimin e bashkëpronësisë në ndërtesa. Kriteri tjetër është trajnimi.

Udhëzimi përcakton se kandidatët duhet të kenë kryer trajnimin profesional fillestar dhe, në vijim, trajnimin e vazhdueshëm vjetor për administrimin e bashkëpronësisë në ndërtesat e banimit. Kurrikulat për mësimdhënien në kurset e administrimit të bashkëpronësisë në ndërtesat e banimit, hartohen nga Ministria e Zhvillimit Urban dhe Ministria e Mirëqenies Sociale dhe Rinisë dhe miratohen nga Ministria e Zhvillimit Urban.

Trajnimi profesional fillestar dhe i vazhdueshëm i personave për kryerjen e veprimtarisë së administrimit kryhet nga institucionet e licencuara nga Ministria e Mirëqenies Sociale. Pas përfundimit me sukses të testit vlerësues, institucioni trajnues lëshon certifikatën për ushtrimin e veprimtarisë së administratorit. Institucioni trajnues është i detyruar që t’i përcjellë të dhënat për personat e certifikuar në Ministrinë e Zhvillimit Urban, brenda 15 ditëve nga dhënia e certifikatave.

Për të ushtruar veprimtarinë e administratorit, krahas certifikatës për përfundimin me sukses të trajnimit fillestar, administratori duhet të kryejë rregullisht trajnimin vazhdues që mbahet çdo tre vjet. Personat juridikë kanë të drejtë të regjistrohen në librin e administruesve edhe personat juridikë, në rast se kanë të punësuar, së paku, një person, me kualifikimin dhe trajnimin e nevojshëm profesional, për çdo ndërtesë nën administrim. Gjithashtu, këto subjekte duhet të vërtetojnë se ortakët, përfaqësuesit ligjorë të shoqërisë, si dhe personat e punësuar për ushtrimin e veprimtarisë së administrimit të bashkëpronësisë nuk janë të dënuar penalisht. Asambleja e bashkëpronarëve mund të kërkojë, si kusht për lidhjen e kontratës së administrimit, që administratori të nënshkruajë një policë sigurimi për mbulimin e dëmeve ndaj të tretëve për gjithë kohën e ushtrimit të detyrës. Në këtë rast, kandidati për administrator brenda 5 ditëve nga lidhja e kontratës për administrimin e bashkëpronësisë, dorëzon pranë njësisë së qeverisjes vendore edhe kopje të policës së sigurimit të nënshkruar prej tij.

Inspektimi
Njësia e qeverisjes vendore, kryesisht ose me kërkesë të çdo të interesuari, fillon procedimin disiplinor ndaj administratorit. Masat disiplinore janë: Paralajmërim me shkrim; pezullim i veprimtarisë; heqje nga libri i administruesve. Kontrolli ushtrohet nga bashkia dhe nga ministria. Mbikëqyrja inspektuese kryhet nga inspektorët e bashkisë, ndërsa, ministria kontrollon zbatimin e ligjshmërisë. Çdo person mund të ankohet në ministri dhe brenda 15 ditëve nis procedura inspektuese, mbi bazën e të cilit merret vendimi.

Administratori është përgjegjësi i vetëm për të gjitha dëmet që mund të ketë shkaktuar me dashje apo nga pakujdesia, si dhe për pasojat e tjera që kanë ardhur për shkak të keqadministrimit të tij. Ai mban përgjegjësi edhe pas heqjes së tij nga libri i administruesve. Në libër shënohen edhe detyrimet që administratori i ka asamblesë së bashkëpronarëve./Gazeta  Shqip

Më të lexuarat