Miliona përdorues të WhatsApp kanë braktisur aplikacionin përpara një azhornimi të privatësisë që do t'i detyrojë ata të ndajnë të dhënat e tyre me Facebook.
Përditësimi, i cili do të dalë në 8 shkurt, prek përdoruesit e WhatsApp në të gjitha vendet jashtë Evropës dhe Mbretërisë së Bashkuar, ku ka ligje të rrepta për mbrojtjen e të dhënave.
Përdoruesve në këto rajone do t'u kërkohet të japin pëlqimin e tyre për Facebook që të ketë qasje në të dhënat e tyre, përfshirë numrat e tyre të telefonit dhe informacionin se si ata ndërveprojnë me të tjerët, në mënyrë që të vazhdojnë të përdorin aplikacionin. Kërkesa do të zbatohet pavarësisht nëse përdoruesi i WhatsApp ka apo jo një llogari në Facebook.
Lajmi ka bërë që shumë njerëz të kalojnë drejt aplikacioneve rivale, sipas të dhënave nga Sensor Tower. Kur ndryshimet e politikës së privatësisë u njoftuan më 7 janar, Telegram mori gati 1.7 milion shkarkime dhe Signal fitoi 1.2 milion shkarkime, ndërsa WhatsApp, i cili zakonisht dominon, fitoi vetëm 1.3 milion shkarkime.
Instalimet e WhatsApp gjithashtu ranë rreth 13 përqind në 10.3 milion shkarkime në shtatë ditët e para të janarit, krahasuar me shtatë ditët më parë. WhatsApp së pari lajmëroi përdoruesit për ndryshimet e reja të politikës së privatësisë në një njoftim javën e kaluar.
Kjo do të thotë që Facebook do jetë në gjendje të përdorë informacionin e llogarisë duke përfshirë numrin tuaj të telefonit, informacionin se si ndërveproni me përdoruesit e tjerë dhe regjistrat se sa shpesh dhe sa kohë përdorni WhatsApp. Të dhëna të tjera që mund të ndahen me Facebook përfshijnë adresën tuaj IP, detajet e shfletuesit, gjuhën dhe zonën kohore.
