Toka bujqësore në rrethinat e Tiranës kushton deri në 100 euro/m2, rreth 70 herë mbi mesataren e BE

06-02-2026

Çmimet e tokës bujqësore pranë kryeqytetit janë dyfishuar në pak vite, duke arritur nivele shumë më të larta se mesatarja e Bashkimit Europian.

Çmimet e tokës bujqësore në rrethinat e Tiranës kanë njohur një rritje të fortë vitet e fundit, duke arritur nivele rekord që i tejkalojnë shumëfish standardet europiane. Në zonën e Farkës, ku rreth tre vite më parë toka bujqësore shitej me rreth 50 euro për metër katror, aktualisht çmimet variojnë nga 70 deri në 100 euro për metër katror.

Sipas të dhënave nga tregu imobiliar, kjo rritje përfaqëson pothuajse një dyfishim të çmimeve brenda një periudhe të shkurtër kohore. Tendenca është e ngjashme edhe në zona të tjera përreth Tiranës, si Mulleti apo Ndroqi, ku çmimi i tokës bujqësore ka kaluar nivelin e 50 eurove për metër katror.

Vlera e lartë për sipërfaqe të mëdha

Në këto zona, blerja e një hektari tokë bujqësore përkthehet në shuma shumë të larta. Një sipërfaqe prej 1 hektari kushton nga 500 mijë deri në 700 mijë euro, ndërsa në Farkë vlera maksimale mund të arrijë deri në 1 milion euro.

Pse po shtrenjtohet toka bujqësore

Sipas Stela Dhami nga “Colliers International Albania”, rritja e ndjeshme e çmimeve lidhet kryesisht me faktin se një pjesë e madhe e tokës bujqësore në rrethinat e Tiranës po shfrytëzohet për ndërtim. Në shumë zona nuk ka më hapësira të gjelbra të lira, ndërsa pritshmëritë për zhvillim urban kanë shtyrë çmimet ndjeshëm lart.

Ajo thekson se edhe vetë pronarët nuk janë të interesuar të ulin çmimet e shitjes, pasi preferojnë të menaxhojnë tokën bujqësore në mënyrë më “të zgjuar”, duke pritur rritje të mëtejshme të vlerës apo duke e orientuar drejt përdorimeve të tjera më fitimprurëse.

Krahasimi me Bashkimin Europian

Në krahasim me vendet e Bashkimit Europian, çmimet e tokës bujqësore në rrethinat e Tiranës janë shumëfish më të larta. Sipas të dhënave të Eurostat për vitin 2024, çmimi mesatar i tokës bujqësore në BE ishte 15,224 euro për hektar, ose rreth 1.5 euro për metër katror.

Krahasuar me vitin 2023, çmimi mesatar i tokës bujqësore në BE u rrit me 6.1 për qind, nga rreth 1.4 euro në 1.5 euro për metër katror, një rritje e moderuar krahasuar me atë që po ndodh në tregun shqiptar.

Vendet me çmimet më të larta dhe më të ulëta në BE

Sipas Eurostat, shteti me çmimin mesatar më të lartë për tokën bujqësore është Malta, me rreth 201,263 euro për hektar. Pas saj renditen Holanda me 96,608 euro dhe Portugalia me 76,556 euro për hektar.

Në skajin tjetër të listës, çmimet më të ulëta janë regjistruar në Letoni me 4,825 euro për hektar, Lituani me 5,590 euro dhe Sllovaki me 5,823 euro.

Referuar të dhënave të detajuara, pas Maltës një nga zonat më të shtrenjta për tokën bujqësore është Flevoland në Holandë, ku në vitin 2024 çmimi arriti rreth 187 mijë euro për hektar. Kjo zonë karakterizohet nga toka shumë pjellore, e krijuar artificialisht dhe e vendosur pranë detit, faktorë që rrisin ndjeshëm vlerën e saj.

Çmime të larta regjistrohen gjithashtu edhe në Ishujt Kanarie të Spanjës, ku toka bujqësore ka arritur në rreth 148 mijë euro për hektar.

Situata në rajon

Në vendet e rajonit, çmimet e tokës bujqësore mbeten ndjeshëm më të ulëta se në rrethinat e Tiranës. Në zonën e Selanikut në Greqi, për shembull, çmimi mesatar i tokës bujqësore është rreth 14,600 euro për hektar, ose afërsisht 1.5 euro për metër katror.

Burimi: Monitor