Shqipëria renditet e dyta në Ballkanin Perëndimor për bizneset që shesin online, me rritje të fortë gjatë vitit 2025.

Shqipëria është një nga vetëm dy ekonomitë e Ballkanit Perëndimor ku shitjet online nga bizneset janë rritur ndjeshëm gjatë vitit 2025, në një kohë kur në nivel rajonal përdorimi i këtij kanali ka shënuar rënie. Pjesa e kompanive shqiptare që shesin mallra ose shërbime online arriti në 26%, nga 19% një vit më parë, duke e renditur vendin të dytin në rajon pas Serbisë.

Sipas të dhënave të publikuara nga Këshilli Rajonal i Bashkëpunimit (RCC), vetëm 20% e bizneseve në gjashtë ekonomitë e Ballkanit Perëndimor shesin aktualisht online. Kjo përqindje është 7 pikë përqindjeje më e ulët se në vitin 2024, kur mesatarja rajonale ishte 27%. Raporti veçon Shqipërinë dhe Serbinë si dy ekonomitë që kanë shënuar rritje të fortë krahasuar me një vit më parë.

Shqipëria kalon nga 19% në 26% brenda një viti

Në Shqipëri, pjesa e bizneseve që përdorin internetin si kanal shitjeje u rrit me 7 pikë përqindjeje, nga 19% në vitin 2024 në 26% në 2025. Në të njëjtën periudhë, Serbia u ngjit nga 17% në 27%, duke zënë vendin e parë në rajon, vetëm një pikë përqindjeje përpara Shqipërisë.

Pas Shqipërisë renditet Maqedonia e Veriut, ku 23% e bizneseve shesin online, ndërsa Mali i Zi regjistron një nivel prej 18%, Kosova 13% dhe Bosnjë-Hercegovina rreth 10%. Shqipëria rezulton kështu 6 pikë përqindjeje mbi mesataren e Ballkanit Perëndimor.

Ndryshimi bëhet edhe më i dukshëm në krahasim me vitin e kaluar. Në vitin 2024, Shqipëria ishte 8 pikë përqindjeje nën mesataren rajonale, me 19% të kompanive që shisnin online kundrejt 27% në Ballkanin Perëndimor. Në vitin 2025 raporti përmbyset, pasi Shqipëria arrin në 26%, ndërsa mesatarja rajonale zbret në 20%, duke e vendosur vendin 6 pikë përqindjeje mbi mesataren.

Tregtia online bie në nivel rajonal

Rënia e mesatares rajonale lidhet me ndryshime të forta në disa ekonomi. Bosnjë-Hercegovina kishte 48% të bizneseve që shisnin online në vitin 2024, ndërsa në 2025 kjo pjesë ra në rreth 10–11%. Kosova zbriti nga 37% në 13% dhe Mali i Zi nga 21% në 18%. Në drejtim të kundërt lëvizën Shqipëria, Serbia dhe Maqedonia e Veriut.

Megjithatë, rritja e numrit të kompanive që përdorin tregtinë elektronike nuk do të thotë se shitjet online kanë marrë një peshë dominuese në xhiron e bizneseve. Në nivel rajonal, 29% e kompanive që shesin online deklarojnë se vetëm 1–10% e të ardhurave të tyre vijnë nga ky kanal, 26% sigurojnë 11–20% të të ardhurave, ndërsa 33% sigurojnë nga 21% deri në 50%.

Për Shqipërinë, raporti evidenton gjithashtu një shpërndarje relativisht të gjerë të peshës së shitjeve online në të ardhurat e kompanive. Kjo tregon se për shumë biznese interneti vazhdon të përdoret si një kanal plotësues krahas shitjeve tradicionale dhe jo si burimi kryesor i xhiros.

Burimi: Ekofin.al