![UNRWA: Me shume se gjysma e Gazes eshte shkaterruar nga lufta UNRWA: Me shume se gjysma e Gazes eshte shkaterruar nga lufta](images/news/gaza e shkaterruar luftaa.jpg)
Juristet kunder hartes se re gjyqesore, rriten kostot per qytetaret
Miratimi i vendimit për hartën e re gjyqësore nga Kolegji i Lartë Gjyqësor (KLGJ) është kundërshtuar nga avokatët.
Më 1 korrik me vendim të Dhomës së Avokatisë së Shqipërisë nisi bojkoti pa afat për seancat gjyqësore penale dhe administrative, si dhe bojkoti për 10 ditë të masave të sigurisë.
Nga avokatët rishpërndarja e gjykatave kundërshtohet, pasi modeli i ri shton kostot për qytetarët, për shkak të largësive fizike të gjykatave.
Aigest Milo partner ekzekutiv në kompaninë ligjore “KALO& ASSOCIATES” tha për “Monitor” se kostot financiare do të rriten dhe do të përkthehen direkt në një barrë më shumë për qytetarët dhe subjektet që përballen me gjykatat.
“Si rrjedhim aksesi në drejtësi dhe mundësia për t’ju drejtuar gjykatave rrezikon të cënohet edhe më tepër në Shqipëri.
Nga ana tjetër, Gjykata e Apelit në Tiranë është disa vite mbrapa me shqyrtimin e ankimeve dhe përqëndrimi në këtë gjykatë i të gjitha çështjeve rrezikon që të përhapë të njëjtën sëmundje edhe në çështjet e mbartura/të reja të juridiksioneve të tjera”.
Z.Milo gjithashtu vlerëson se rishpërndarja e gjykatave nuk zgjidh problemet aktuale, që nga mungesa e gjyqtarëve apo stokun e dosjeve të pashqyrtuara.
“Harta e re gjyqësore, pavarësisht ka disa kohë që po diskutohet, për mendimin tim, por edhe të komunitetit të gjerë të avokatëve, nuk i zgjidh problemet që gjyqësori ynë ka prej vitesh.
Përkundrazi, duket sikur kjo reformë është më tepër një makiazh për të fshehur këto probleme, sesa një përpjekje për t’i dhënë një zgjidhje përfundimtare atyre.
Këshilli i Lartë Gjyqësor dhe Ministria e Drejtësisë akoma edhe sot nuk kanë paraqitur ndonjë raport nëse numri i gjyqtarëve që do të rezultojnë nga harta e re arrin të mbulohet ose jo nga gjyqtarët në detyrë.
Frika ekziston se sistemi i drejtësisë nuk e ka personelin e nevojshëm për të populluar super gjykatat e reja të krijuar, gjë që do të çojë në një thellim të problematikave të hasura deri më tani,” thekson ai.
Rishpërndarja e re e gjykatave parashikon 12 gjykata të shkallës së parë nga 22 që janë aktualisht.
Gjykatat e propozuara të shkallës së parë të juridiksionit të përgjithshëm janë, si: Berat, Elbasan, Tiranë, Vlorë, Dibër (bashkuar me Gjykatën e Matit), Durrës (bashkuar me gjykatat e Kavajës dhe Krujës),
Fier (bashkuar me Gjykatën e Lushnjës), Gjirokastër (bashkuar me gjykatat e Sarandës dhe Përmetit), Kukës (bashkuar me Gjykatën e Tropojës), Korçë (bashkuar me Gjykatën e Pogradecit), Lezhë (bashkuar me Gjykatën e Kurbinit) dhe Shkodër(bashkuar me Gjykatën e Pukës).
Po ashtu duke qenë se 4 gjykata apeli nga 6 kanë ngarkesë pune të mjaftueshme për të justifikuar minimumin prej 10 gjyqtarësh të kërkuar nga ligji, rrethanat aktuale sipas raportit të grupit të punës nxjerrin në pah nevojën për shkrirjen e të gjitha gjykatave dhe propozimin e një Gjykate Kombëtare Apeli në Tiranë.
Juristi Aigest Milo nënvizon se modeli i miratuar nga KLGJ duket se i është referuar atij të përdorur për gjykatat administrative, që gjenden në nivel sipërfaqësor të trajtimit të dosjeve.
Për këtë arsye, sipas tij nxitimi për të përqendruar gjykatat në pak vende, duket i nxituar dhe potencialisht i rrezikshëm për mbarëvajtjen e sistemit të drejtësisë.
“Në mënyrë që sëmundjet të mund të shërohen njëherë e përgjithmonë, duhet që në radhë të parë të kuptojmë dhe të jemi të hapur mbi problemet që na kanë sjellë ketu.
Mendoj se reforma në drejtësi, përtej argumenteve pro dhe kundër, duhet të ishte shpjeguar më mirë, zbatuar më mirë që të evitoheshin kostot të cilat kemi vite që i paguajmë. Në vijim, çdo reformë, dhe ndryshimi i hartës territoriale duhet të zbatohet gradualisht, me faza.
Të gjithë jemi dëshmitarë që reformat radikale në Shqipëri, siç kanë filluar ashtu edhe janë lënë në mes të rrugës pasi nuk janë zbatuar siç duhet apo nuk janë përthitur siç duhet nga aktorët përkatës,” thotë z.Milo.
Pas miratimit nga KLGJ vendimi për hartën gjyqësore duhet të miratohet edhe nga Këshilli i Ministrave. Harta e re hyn në fuqi 6 muaj pas miratimit nga qeveria.
Më herët kryeministri Edi Rama deklaroi se harta gjyqësore nuk ndryshon dhe bojkoti i seancave gjyqësore nga avokatët nuk është mënyra e duhur për të arritur sukses.
Burimi: Monitor https://www.monitor.al/juristet-kunder-hartes-se-re-gjyqesore-rriten-kostot-dhe-rrezikon-te-cenohet-aksesi-ne-drejtesi/
Më të lexuarat
![UNRWA: Me shume se gjysma e Gazes eshte shkaterruar nga lufta UNRWA: Me shume se gjysma e Gazes eshte shkaterruar nga lufta](images/news/gaza e shkaterruar luftaa.jpg)
![Raporti global 2024, perkeqesohet hendeku gjinor ne Shqiperi Raporti global 2024, perkeqesohet hendeku gjinor ne Shqiperi](images/news/perkeqesohet hendeku ghinor 2024.jpg)
![Kredite e shpejta drejt fundit, BSH po pergatit rregulloren qe do kufizoje huadhenien Kredite e shpejta drejt fundit, BSH po pergatit rregulloren qe do kufizoje huadhenien](images/news/rregullore per mikrokredittt.jpg)
![Bota ende e papergatitur per pandemine e ardhshme Bota ende e papergatitur per pandemine e ardhshme](images/news/bota papergatirutr pandemi.jpg)
![Veliaj: Kete vere shperndajme banesat e reja per familjet e Kombinatit Veliaj: Kete vere shperndajme banesat e reja per familjet e Kombinatit](images/news/pallatet ne kombinat brenda veres.jpg)
![Monument kulture, nisin punimet perforcuese ne Uren e Zogut Monument kulture, nisin punimet perforcuese ne Uren e Zogut](images/news/restaurimi i ures se zogut ne mat.png)
![Prej 2 muajsh euro ne kufijte e 100 lekeve, priten tre nderhyrje nga Banka e Shqiperise Prej 2 muajsh euro ne kufijte e 100 lekeve, priten tre nderhyrje nga Banka e Shqiperise](images/news/tre nderhzrje nga banka e shqiperiseee bsh.jpg)
![Balluku: Se shpejti hapet gara nderkombetare per Portin e Ri Tregtar ne Durres Balluku: Se shpejti hapet gara nderkombetare per Portin e Ri Tregtar ne Durres](images/news/gara port tregtar dr.jpg)
![Rritet numri i te punesuarve nen 18 vjeç, dominon sektori i sherbimeve Rritet numri i te punesuarve nen 18 vjeç, dominon sektori i sherbimeve](images/news/te rinjte nen 18 sherbim.png)
![Ne korrik 30 vendqendrime avionesh, Et’hemaj: Zgjerohet terminali i Rinasit Ne korrik 30 vendqendrime avionesh, Et’hemaj: Zgjerohet terminali i Rinasit](images/news/zgjerimi i pistes 3 herre.jpg)