Zgjedhjet ne Veri te Kosoves, KQZ shtyn afatet e aplikimit
KQZ ka shtyrë afatin e aplikimit për certifikim të subjekteve politike dhe kandidatëve për zgjedhjet në komunat me shumicë serbe në veri të Kosovës.
Afati fillestar për procesin e aplikimit ishte caktuar deri më 21 nëntor. Sipas KQZ-së, rrjedhimisht është shtyrë edhe afati për certifikimin ose jo të subjekteve dhe kandidatëve nga 26 nëntori më 28 nëntor.
KQZ-ja ka thënë se deri më tani ka pranuar dy aplikime për certifikim – nga Partia Demokratike e Kosovës për të katër komunat dhe nga Iniciativa Qytetare Mitrovica për zgjedhjet në Mitrovicë të Veriut.
Vendimi për ndryshim të afateve pason ankesën e anëtarit të KQZ-së nga radhët e Lëvizjes Vetëvendosje, Ali Rama, i cili ka konsideruar që afatet fillestare kanë qenë të shkurtra.
Zgjedhjet e jashtëzakonshme në katër komunat - Mitrovicë e Veriut, Zubin Potok, Leposaviq dhe Zveçan – janë shpallur pas dorëheqjes së zyrtarëve që kanë qenë në këto pozita më 5 nëntor.
Ata kanë marrë këtë vendim, pas shkarkimit të drejtorit të Policisë së Kosovës për rajonin e veriut, Nenad Gjuriq, për shkak të refuzimit të zbatimit të vendimit të Qeverisë së Kosovës për riregjistrimin e veturave me targa ilegale serbe në RKS – Republika e Kosovës.
Qeveria e Kosovës ka nisur zbatimin e vendimit për targat më 1 nëntor. Serbët nga veriu i Kosovës dhe Beogradi zyrtar kundërshtojnë riregjistrimin e makinave dhe kërkojnë targa neutrale ndaj statusit të Kosovës.
Kryeministri i Kosovës, Albin Kurti dhe presidenti serb, Aleksandar Vuçiq kanë diskutuar për këtë çështje të hënën në Bruksel, mirëpo palët nuk kanë arritur marrëveshje.
"Pas shumë orë diskutimesh, dy palët nuk u pajtuan për zgjidhjen sot", ka thënë kryediplomati i Bashkimit Evropian, Josep Borrell. Plani i Qeverisë së Kosovës për riregjistrimin e makinave me targa të lëshuara nga Serbia ka paraparë tri faza.
Faza e parë përfshinte qortimin e shoferëve, e dyta shqiptimin e gjobës prej 150 eurosh për ata shoferë, dhe e treta targat provuese.
Zbatimi i këtij plani është paraparë të përfundojë më 21 prill dhe nga ajo datë, parashihet që në komunikacion të lejohen vetëm makina me targa të ligjshme, RKS, apo Republika e Kosovës./Burimi: REL
Afati fillestar për procesin e aplikimit ishte caktuar deri më 21 nëntor. Sipas KQZ-së, rrjedhimisht është shtyrë edhe afati për certifikimin ose jo të subjekteve dhe kandidatëve nga 26 nëntori më 28 nëntor.
