Fondet buxhetore për e-qeverisjen rriten me 443 për qind në 6 vite
Infrastruktura digjitale nën zërin “e-qeverisja” po rrit peshën e financimeve nga fondet publike.
Në buxhetin 2025 janë planifikuar të financohen për këtë program rreth 12.5 miliardë lekë (125 milionë euro). Kjo shumë është 40 për qind më e lartë se fondi i programuar në buxhetin fillestar 2024 dhe 9% më i lartë se akti i dytë normativ.
Në vitin 2018 financimet për e-qeverisjen ishin 2.3 miliardë lekë. Në 6 vitet e fundit financimi i shërbimeve publike digjitale është rritur me 443 për qind.
Në buxhetin fillestar të këtij viti fondet për “e-qeverisja” ishin programuar në nivelin 8.6 miliardë lekë, ndërsa me ndryshimet që u bënë me dy akte normative financimi për “e-qeverisja” është 11.5 miliardë lekë aktualisht.
Infrastruktura digjitale po bëhet po aq e rëndësishme dhe jetike sa infrastruktura fizike, rrugët, uji dhe energjia. Tashmë kur shumica e shërbimeve qeveritare jepen online dhe mund të merren nga telefonat e zgjuar, qeveria në anën tjetër po rrit shpenzimet për këto shërbime.
Të dhënat zyrtare nga Ministria e Financave tregojnë se nga viti 2016 në vitin 2024 janë financuar më shumë se 42 miliardë lekë, rreth 400 milionë euro për sistemet e-albania. Financimet vjetore në infrastrukturën e-albania renditen të katërtat në radhë pas investimeve publike në transportin rrugor, detar dhe në ujësjellës.
Mirëpo kur një mori shërbimesh jepen online, qytetarët mbeten të ekspozuar ndaj korrupsionit dhe mos marrje së shërbimit. Mungesa e ndërveprimit ndërmjet institucioneve e bën të pamundur marrjen e dokumenteve në kohë, madje shërbimet mbeten të pezulluara për muaj të tërë.
Nga ana tjetër publiku i gjerë ka ende njohuri të kufizuara për përdorimin e këtyre shërbimeve dhe nga ana tjetër transparenca mbetet një problematike për shkak se produktet e infrastrukturës digjitale janë më pak të prekshme.
Agjencia Kombëtare e Shoqërisë së Informacionit raporton se 1245 shërbime elektronike ofrohen në portalin qeveritar e-albania, në të cilin bashkëveprojnë 63 sistem elektronike.
Infrastruktura digjitale publike e vendit tonë ka rezultuar e brishte përderisa një seri sulmesh kibernetike kanë ekspozuar të dhëna konfidenciale të qytetareve disa herë vitet e fundit, nga dokumentet e identifikimit deri të llogaritë bankare.
Një anketë e Programit të Kombeve të Bashkuara PNUD tregoi se në vitin 2022, shumica dërrmuese e të anketuarve mbi 90% raportuan se ishin në dijeni që qeveria ofron shërbime elektronike nëpërmjet portalit e-albania.
Megjithatë, më pak se gjysma e tyre rreth 47 raportuan se mund të lidhen me portalin e-albania pa ndihmën e të tjerëve. Përqindja e të anketuarve që i cilësuan shërbimet si funksionale, të lehta për t’u përdorur dhe efecientë në kohë ishte më e ulët në 2022 sesa në 2021./ Monitor (https://monitor.al/fondet-buxhetore-per-e-qeverisja-rritje-me-443-ne-6-vite/)
Më të lexuarat
