Nga kullat te gjelbërimi, ja çfarë parashikojnë projektet për stadiumin e ri Selman Stërmasi

Po zhvillohet sot faza finale e Garës Ndërkombëtare për Projekt-Ide Arkitekturore për Rilindjen e Stadiumit “Selman Stërmasi”, ku pesë skuadrat finaliste do të prezantojnë përpara jurisë konceptet arkitektonike. 

Projekt-idetë, të cilat kompanitë që kanë kaluar fazën e parë të rijetëzimit të stadiumit “Selman Stërmasi”, që po prezantohen këtë të premte kanë një emërues të përbashkët: zhvillim urban ku stadium është plotësues i saj por jo dominues.

Konkretisht ky zhvillim parashikon zona rezidenciale në një apo më shumë kulla, zona retail dhe argëtimi por edhe hapësira çlodhëse për komunitetin ku në disa raste integrohet edhe gjelbërim. Por cilët janë projekt-idenë e prezantua sot?

I pari nga OMA + RH DHV + LOLA Landscape Architects + Albanian Investment Construction sh.p.k + Diagonal Projektim & Zbatim sh.p.k ”

Përfaqësuesi i këtij bashkimi kompanish nënvizoi se përmes projektit kërkohet që të ruhet elementi komunitar që ka sot kjo zonë. “Stadiumi është në sfond por nuk dominon dhe në besojmë që ndjenja e komuniteti edhe kur të rijetëzohet duhet të mbetet. Janë 110 mijë metra zhvillim.

Ngjitur me stadiumin duam të ndërtojmë një mjedis urban ku njerëzit të qëndrojnë 24 ore në ditë. Platforma me vëllime më të mëdha që duke u ngjitur drejt pjesës së tarracës së stadiumit do të krijojë 10 mijë metra hapësire publike. Do të shtojmë hapësira dhe do të kemi mundësi që sheshi të përdoret dhe gjatë ndeshjeve” tha ai. Janë katër kulla ku më e lartë 105 metra dhe e dedikuar për banim. Hapësirat parashikojnë 30 mijë m2 hapësire rezidenciale, hotel 11.9 mijë, zyra 16 700, sporte 15 700, retail 29 700 m2 .

I dyti nga “Far Frohn & Rojas + sbp-schlaich-bergermann-partner + TOPOTEK I + Transsolar Klimaengineering + Adrian Paci + Progeen sh.p.k”

Përfaqësuesi i këtij bashkimi kompanish tha se projekti synon të ftojë gjithë qytetin dhe angazhon pra është e kundërta e një stadiumi që i kthen kurrizin qytetit.

“Ky stadium ka një prani të madhe dhe për kujtesën kolektive të qytetit. Dy fusha janë në bazë të saj që veprojnë si magnete duke përthithur pjesë të tjera. Stadiumi ofron vend për 16 mijë vetë, sa janë standardet e UEFA.

Kemi një pjesë të ngritur urbane me tipologjitë e veta në rritje. Kemi recepsion hoteli, kinema, salla sportive, restorante dhe hapësira për aktivitete dhe dyqane. Në anën tjetër kafene, treg i vogël por dhe një hapësire për një bibliotekë të lagjes në katin e pare. Një pjesë e dytë e strategjisë parashikon një strukturë si skelet që ka të njëjtën lartësi çdo kat dhe ofron rezistencë dhe e dedikuar për hapësira banimi, zyra apo hotele”.

I treti ishte projekti nga “Foster & Partners + Artech Studio sh.p.k + Artech Group + Bolv Oil.

Përfaqësuesi i bashkimit të këtyre kompanive tha se hapësira ku shtrihet projekti është sfiduese dhe me një problem kompleks.

“Menduam se çelësi është tek gjelbërim që gjendet aty dhe menduam që është pjesë e një parku, kopsht dhe ka të bëjë me shumë breza që do të vijnë. Krijimi i një oaz i të gjelbër. Ideja jonë është e një stadiumi për poshtë sa më shumë të jetë e mundur. Puna në terren me dheun nuk është kaq e shtrenjtë dhe ti krijon peizazh të jashtëzakonshëm dhe mund ta zhvendosësh për të ndërtuar. Këtu mund të ndërtohet një gjerdan shumë delikat ndërtesash që të jenë të ulëta në anët e tyre, në mënyrë që të mund të hysh nga kudo në këtë hapësirë.

Duhet lejuar që dhe publiku ta përdorë fushën. Keni bërë një stadium të mrekullueshëm (AIR Albania)është ndryshe por është e gabuar të ndërtojmë një tjetër si ai. Duam të krijojmë një kopsht që është i gjithi këtu por sidomos pjesa ku mund të ngjitesh dhe të shijosh diçka gjatë ditëve të nxehta. Kulla është në perëndim sepse të gjithë e duan perëndimin që të mund të shihet” tha ai.

I katërti është projekt ideja nga “ZAHA HADID Architects + AGIKONS sh.p.k”

Në fjalën e tij përfaqësuesi i kompanive tha se synohet të ndërtohet një pol sportiv ku stadiumi integrohet me hapësira te mirëqenës.

“Ne jemi te fokusuar tek qëndrueshmëria. Duke pasur parasysh përvojën që kemi me stadiumet kjo na ndihmoi shumë për këtë projekt ide. Kjo zonë është shumë ndryshe, shumë unike dhe e veçantë në raport me ato që kemi punuar më parë dhe kërkonte vëmendje më të madhe. Me rëndësi është integrimi i stadiumit me zonën rezidenciale, krijimin e një pikë qendrore në qytet dhe një zonë për komunitetin që jeton aty por dhe qytetin por dhe ruanim karakterin e kësaj zone të Tiranës që mund të presë disa nga garat më të prestigjioze por edhe për zhvillimin e ekipeve të qytetit .

Pra ideja ishte si ta bënim stadiumin të zhdukej gjatë javës, si mund të krijonim diçka që në ditët e javës të dukej sikur nuk dukej sepse do të fshihej pas kopshteve shatërvanëve dhe hapësirave të tjera. Suksesi do të arrihej kur të krijonim sinergjinë mes stadiumit dhe një qendre  shumë funksionale sportive në mënyrë që të rrisim shanset për mundësinë që ajo të funksionojë nga aspekti ekonomik dhe financiar duke rritur këtë lloj infrastrukture por duke sjellë ndikim më pozitiv për komunitetin. Do të kemi 53 mijë metër katror banim , 10 mijë katror zyra dhe në afërsi të stadiumit 10 mijë metra hapësirash tregtare dhe dyqane dhe 20 mijë m2 hotel dhe një qendër sportive 12 mijë metër katror” tha ai.

Projekti pesë erdhi nga “Office KGDVS + l’AUC + Baukuh + ARQUITECTURA-G + Yellow Office + Ne Arkitektët + Matilde Cassani + Bollinger & Grohmann + ALES Construction”

Përfaqësuesi i kompanive tha se është krijuar një ndërtesash që lidhen me njëra-tjetrën që por edhe me stadiumin. “Projekti nisi me një lloj tërheqje të konfuigurimit aktual të stadiumit dhe brezin e gjelbër që ka aktualisht. Është një impakt i rëndësishëm i tij dhe qytetit ndaj duhet zhvilluar stadiumi brenda këtij konteksti. Sfida është :A mund të ndërtohet një stadium i kategorisë 4 të UEFA pa shkatërruar këtë brez të gjelbër.

Ulim pak më poshtë stadiumin për të rritur kapacitetin. Shihni ruajtjen e pemëve dhe barrierën që ndan pjesën. Ka hapësirë për katër hyrje të ndryshme. Pjesa e tribunave veriore-lindore janë të dukshme si një disk blu lundrues që forcon formën e hapësirave të gjelbra. Nga këtu prezantohet me pjesën perëndimore që siç ndodh sot është në ndërtim të mirëfilltë. Tribuna perëndimore është me përvojën e pjesëmarrësve VIP që ka një tarracë për publikun.

Stadiumi ka komunikim me qytetin. Të gjithë elementët janë këtu, parku, hapësirat urbane. Stadiumi edhe pse është i hapur dhe i aksesushem, në hapësirën e parkut ka ndërtime që bëhen të aksesueshme, janë pjesë e qytetit, nuk janë e ndarë dhe shkrihen me të. Ky urbanizëm konfeti  na ofron ndërtesa me karkter dhe që kanë lidhje me njëra tjetrën dhe kanë një logjikë kolektive” detajoi ai.

/Monitor (https://monitor.al/nga-kullat-te-gjelberimi-jka-cfare-parashikojne-projektet-per-stadiumin-e-ri-selman-stermasi/)

Më të lexuarat