1.4 mld euro në vit nga emigrantët, kryesojnë Italia, Britania dhe Gjermania

26-01-2026

Në 2024 emigrantët dërguan 1.4 miliardë euro në Shqipëri, sipas të dhënave të Eurostat.

Në vitin 2024, emigrantët dërguan në Shqipëri 1.4 miliardë euro, sipas të dhënave të publikuara nga Eurostat, i cili mat transfertat personale, që janë kryesisht paratë që emigrantët u dërgojnë familjeve të tyre, zakonisht pa kundërshpërblim. Shuma e deklaruar nga Eurostat rezulton më e lartë se ajo e raportuar nga Banka e Shqipërisë, sipas së cilës transfertat e emigrantëve në vitin 2024 ishin rreth 1 miliard euro. Eurostat publikon gjithashtu transfertat e ndara sipas shteteve pritëse të emigrantëve.

Ndryshimi i gjeografisë së remitancave

Tradicionalisht Italia dhe Greqia kanë qenë shtetet me dërgesat më të larta, për shkak të numrit të madh të emigrantëve që u larguan në fillim të viteve ’90 dhe vijuan më pas, të ndihmuar edhe nga afërsia gjeografike. Megjithatë, të dhënat e vitit 2024 tregojnë se gjeografia e remitancave ka ndryshuar pjesërisht, duke e zhvendosur Greqinë në favor të destinacioneve më të reja të emigracionit, si Mbretëria e Bashkuar dhe Gjermania.

Italia, Britania dhe Gjermania në krye

Italia vijon të kryesojë renditjen, me emigrantët që jetojnë në këtë vend që kanë dërguar 370 milionë euro në vitin 2024, ose 25.7% të totalit të dërgesave. Në vend të dytë renditet Mbretëria e Bashkuar, nga e cila janë dërguar 243 milionë euro. Ky vend ka pritur shumë shqiptarë vitet e fundit, duke u kthyer edhe në një shqetësim për qeverinë britanike për shkak të fluksit të lartë të emigrantëve të paligjshëm. Një numër i konsiderueshëm shqiptarësh raportohet se punojnë në shtëpitë e kultivimit të kanabisit, çka gjeneron të ardhura të shpejta dhe të larta, të reflektuara në transfertat drejt Shqipërisë.

Gjermania dhe rënia e Greqisë

Në vend të tretë renditet Gjermania, nga e cila janë dërguar transferta me vlerë 231 milionë euro. Ky shtet ka qenë vitet e fundit destinacion i preferuar për profesionistë si mjekë, infermierë dhe specialistë të teknologjisë së informacionit, të cilët përfitojnë paga relativisht të larta dhe mbështesin financiarisht familjet në Shqipëri. Greqia, pavarësisht numrit të madh të shqiptarëve që jetojnë dhe punojnë atje, renditet vetëm e katërta me 202 milionë euro, edhe për shkak të transferimeve cash që realizohen përmes lidhjeve tokësore.

Shtetet e tjera dhe pesha totale

Shtetet e Bashkuara të Amerikës renditen në vend të pestë, me 159 milionë euro të dërguara në vitin 2024. Pas tyre vijnë Franca me 38 milionë euro, Irlanda me rreth 24 milionë euro, Kanadaja me gati 20 milionë euro, Zvicra me 19.3 milionë euro, Belgjika me 15.1 milionë euro dhe Austria me 11 milionë euro. Nga shtetet e tjera transfertat personale janë më të ulëta se 10 milionë euro, ndërsa shqiptarët kanë depërtuar edhe në qendra offshore financiare, ku dërgesat mbeten minimale, rreth 1.4 milionë euro në vit.

Transfertat totale dhe kompensimi i punonjësve

Sipas Eurostat, gjatë vitit 2024 janë dërguar në Shqipëri rreth 2.1 miliardë euro nga transfertat personale dhe kompensimi i punonjësve. Rreth 68% e kësaj shume ishin transferta personale nga emigrantët, ndërsa pjesa tjetër prej rreth 32%, ose 663 milionë euro, lidhet me kompensimin e punonjësve.

Burimi: Monitor