750 mln euro kredi per termetin: Rrisin borxhin publik ne 72 per qind te PBB

Rreth 750 mln euro nga totali i fondeve të mbledhura në konferencën e donatorëve në Bruksel janë kredi dhe projekte. 

Pas konferencës së donatorëve minsitri i Zhvillimit Arben Ahmetaj sqaroi se si ndahet fondi i mbledhur me vlerë 1,15 mld euro për rindërtimin e zonave të prekura nga tërmeti. Ahmetaj tha se 400 milionë euro nga totali i fondit janë donacione, ndërsa 750 milionë euro janë kredi e butë. “Rreth 400 milionë euro janë grante, pra që do të thotë që janë para që nuk na i japin borxh, por na i dhurojnë. Pjesa tjetër 750 milionë euro janë kredi e butë, që do të thotë me një kosto shumë të ulët qoftë në apektin e kostos së parasë dhe kostos së operacionit, pra nuk janë kredi tregtare”, tha Ahmetaj. 

Sipas përllogaritjeve të Monitor, bazuar në shifrat e kuadrit makroekonomik e fiskal, për periudhën 2021–2023 kredia që do t’i jepet Shqipërisë për rindërtimin e zonave të dëmtuara zë 5,5 për qind të Prodhimit të Brendshëm Bruto, të këtij viti. Kjo kredi e rrit borxhin publik në raport me GDP-në, nga 66,2 për qind që ishte në fund të 2019-s, sipas të dhënave të Kuadrit, në gati 72% të PBB-së.

Interesat e kredive

Ministri i Zhvillimit, Ahmetaj tha se fondet e mbledhura si kredi nuk do të jenë me interesa tregtare, por më të ulët se 2 për qind. “Ishte një mbështetje spektakolare, dhe solidaritet për familjet që kanë humbur pjestarët e tyre. Shumë prej këtyre kredive interest I kanë të përcaktuara dhe janë nën 2 për qind. Kredia e Bankës Islamikë që është 365 milionë euro ëhstë me interesa gati gati te 1 për qind”, u shpreh Ahmetaj.

Franca dhuroi 1 milionë euro

Ministri i Zhvillimit sqaroi edhe dhënien e fondeve të Francës, të cilat ishin të paqarta. Sipas tij Franca dhuroi 1 milionë euro, ndërsa 100 milionë euro janë projekte për rizhvillimin ekonomik. Franca dha një kredi prej 60 milionë euro për rindërtimin e rrjetit të ujit të pijshëm të dëmtuar nga tërmeti.

Konferenca e donatorëve

Konferenca ndërkombëtare e donatorëve, u thirr nga Presidentja Komisionit Europian znj. Ursula von der Leyen. Kjo konferencë “Së bashku për Shqipërinë” u mbajt pas ngjarjes së tërmetit të 26 nëntorit, ku u prekën rreth 200 mijë qytetarë dhe 51 të tjerë gjetën vdekjen. Komisioni Europian në ndihmë të Shqipërisë dha 115 milionë euro fonde, ku 15 milionë ishin grante për rikonstruksionin e shkollave. Shqipëria prezantoi faturën me vlerë 1 miliardë euro si kosto për rindërtimin dhe zhvillimin e zonave të prekuara. 

Pjesën më të madhe të fondeve të dhënë e zëne kreditë e buta, si ajo e Bankës Botërore me vlerë 160 milionë euro për strehimin, 360 mln euro nga Banka Islamike për Zhvillim, 100 mln euro nga Banka Europiane e Investimeve, si dhe 80 mln euro nga BERZH. Shtetet që kanë dhuruar shumat më të larta ishin Gjermania me 11 mln euro, Suedia 5,6 mln euro, Serbia 1 mln euro, ndërsa Italia deklaroi se 65 mln euro janë identifikuar si burime financiare./Burimi: Monitor.al

Më të lexuarat